Мұқанның музыкасы
<p style="text-align: justify;">Еркеғали Рахмадиев атындағы Мемлекеттік академиялық филармониясының Симфо­ния­лық оркестрі, Камералық хоры, «Қорқыт» дәстүрлі саз тобы, классикалық вокал бөлімі мен филармонияның дәстүрлі әншілері көр­некті композитор Мұқан Төлебаевтың 110 жыл­дығына арналған «Мұқанның мәңгілік мұ­расы» атты сазды кешін ұсынды.</p>
КСРО халық әртісі, КСРО Мемлекеттік сыйлығының лауреаты Мұқан Төлебаев қазақ музыка өнерінде өшпес із қалдырды. Оның мұрасы – қазақ кәсіби музыкасының биік шыңы. Композитордың шығармашылық қоржынында түрлі жанрдағы жүзден аса шығарма бар: опералар, симфониялық оркестрге арналған увертюралар мен фантазиялар, драмалық спектакльдер мен фильмдерге арналған музыкалар, романстар, әндер, хор және фортепианолық шығармалар. Бұл туындылар музыка тілінің шынайылығымен, өзіндік қолтаңбасымен ерекшеленеді. Шығармашылық мол мұра қалдырған композитордың рухына тағзым ету – маэстроның музыка саласындағы ізбасарларының ғана емес, ұлттың да үлкен борышы саналады.
Е.Рахмадиев атындағы Мемлекеттік академиялық филармониясы Симфониялық оркестрінің концертінде «Қазақстан» симфониялық поэмасы, «Менің Қазақстаным», «Бақыт вальсі», «Тос мені тос», «Кестелі орамал», «Толғау», «Мереке би», «Той» симфониялық картинасы, «Біржан сал» операсынан Сараның ариясы және басқа да туындылары орындалады. Кеш солистері – халықаралық байқаулардың лауреаттары Шахризада Тыныштық, Қуаныш Біләл, Сәулежан Тағзия, Алмат Ізбамбетов, Әйгерім Аманжолова, Алтынбек Арыстанбек, Талғат Аллабиринов, Азамат Жылтыргөзов. Кештің дирижері Симфониялық оркестрдің көркемдік жетекшісі Әділ Бестембеков болды.