Теннисші тартуы
<p style="text-align: justify;">Ұлыстың ұлы күні – әз Наурыз мейрамы қарсаңында мұхиттың арғы бетінен сүйінші хабар жетті. Теннистен еліміздің бірінші, әлемнің жетінші ракеткасы, «Үлкен дулыға» санатындағы «Уимблдон» турнирінің жеңімпазы Елена Рыбакина Қазақстан теннисшілері арасында тұңғыш рет «BNP Paribas Open» (WTA 1000) турнирінде топ жарды. Ол финалда Беларусь мақтанышы, әлемнің екінші ракеткасы Арина Соболенконы тізе бүктірді.</p>
АҚШ-тың Индиан-Уэллс қаласында ұйымдастырылған бұл дода – теннисшілердің «Үлкен дулыға» санатындағы төрт ірі жарысынан кейінгі орында тұратын шоқтығы биік бәсеке. 1974 жылы тұсауы кесілген жарыста бүгінге дейін небәрі 17 мемлекеттің ғана өкілі үздік шыққан екен. Енді бұл қатарға Қазақстан теннисшісі Елена Рыбакина да қосылды.
АҚШ-тағы теннисшілер сайысының финалын тек Қазақстанның ғана емес, бүкіл әлемнің жанкүйерлері тағатсыздана күтті. Өйткені осыдан бірер ай бұрын дәл осы екі теннисші Аустралия ашық чемпионатының финалында кездесіп, сол сайыста Аринаның мерейі үстем болған еді. Ал бұл кездесуде көпшілікті Елена Рыбакина Мельбурндегі есесін қайтара ала ма деген сұрақ қызықтырды.
Тартысты бәсекенің бірінші партиясында екі теннисші де аса сақтықпен ойнап, қателік жасамауға тырысты. Бесінші геймге келгенде бірінші болып Рыбакинаның жүйкесі сыр берді. Допты өзі ойынға қосқан геймде қарсыласына брейк жасауға мүмкіндік беріп қойды – 3:2. Бірақ көп ұзамай Еленаның өзі де қайыра брейк жасап, тез арада таразы басын теңестіріп үлгерді – 4:4. Кейінгі төрт геймде екі теннисші де сауатты ойынымен көзге түсіп, бір-бірін алға жіберген жоқ – 6:6. Сөйтіп бірінші партияның жеңімпазы тай-брейкте анықталды. Бұл кезеңде Елена Рыбакинаның бағы жанды – 7:6 (13:11). Бірінші партияда теннисшілер бір сағат 20 минут ойнады.
Екінші сетті отандасымыз «ә» дегеннен брейкпен бастады. Таблодағы көрсеткіш 4:2 болып тұрған жетінші сетте Елена тағы да бір брейк жасап, 5:2 есебімен алға ұзап кетті. Сегізінші геймде Рыбакинаның ойынды аяқтайтын тамаша мүмкіндігі болды. Бірақ допты ойынға қосқан сетте бірде-бір ұпай ала алмай, Соболенкоға 40:0 есебімен жол беріп қойды – 5:3. Дегенмен, отандасымыз келесі мүмкіндігін 100 пайыз пайдаланып, екінші сетті 6:4 есебімен өз пайдасына аяқтады. Екі сағаттан астам уақытқа созылған бәсеке барысында Елена 7 эйс жасап, 10 брейк-пойнттың үшеуін пайдаланды.
Осылайша, алғаш рет WTA 1000 жарысының жеңімпазы атанған Е.Рыбакина А.Соболенкодан Аустралия ашық чемпионатының финалында кеткен есесін қайтарды. Сондай-ақ Елена Рыбакина спорттық жолында алғаш рет әлемдік рейтингте жетінші орынға көтерілді. Бұл – оның жеке рекорды.
Елена Рыбакинаның «BNP Paribas Open» турниріндегі жүріп өткен жолына зер салар болсақ, жарысты екінші айналымнан бастаған ол алғашқы кездесуін 2020 жылғы Аустралия ашық чемпионатының жеңімпазы, әлемдік рейтингте 170-орында тұрған америкалық Софья Кенинді (7:6, 7:6), үшінші кезеңде әлемнің 22-ракеткасы испаниялық Паула Бадосаны (6:3, 7:5), төртінші айналымда дүниежүзілік рейтингте 66-сатыға жайғасқан ресейлік Варвара Грачеваны (6:3, 6:0) жеңіп, ширек финалға жолдама алды. Ал ¼ финалда Каролина Мухованы екі сетте 7:6, 6:4 есебімен жарыс жолынан ығыстырса, жартылай финалда әлемнің 1-ракеткасы польшалық Ига Швентектен айласын асырды – 6:2, 6:2.
«BNP Paribas Open» турнирінде топ жарған Елена Рыбакина 1 271 230 АҚШ доллары (574 550 449 млн теңге) көлеміндегі қаржылай сыйақы мен 1 000 рейтингтік ұпайға ие болды. Ал турнирдің ерлер арасындағы бәсекесінде 19 жастағы испаниялық Карлос Алькарас жеңіс тұғырына көтерілді. Ол финалда ресейлік Даниил Медведевті екі сетте 6:3, 6:2 есебімен тізе бүктірді.