Әлемдік рейтинг жаңарды
<p style="text-align: justify;">Халықаралық дзюдо федерациясы (IJF) Түркияның Анталия қаласында мәресіне жеткен «Grand Slam» жарысынан кейін дзюдошылардың әлемдік рейтингін жаңартты.</p>
Өкінішке қарай, халықаралық ұйым ұсынып отырған рейтингте Қазақстан балуандарының нәтижесі жанкүйерлердің көңілін көншітпейді. Өйткені жаңартылған рейтингтің ТОП-10 тізіміне бір-ақ балуанымыз енген. Кейінгі уақытта тәуір нәтижесімен көзге түсіп, үнемі жүлдегерлер қатарынан көрініп жүрген Әбиба Әбужақынова (48 кг) өз салмағында бесінші сатыға жайғасқан. Одан кейінгі үздік нәтиже ерлер құрамасының өкілдері – Мағжан Шамшадин (60 кг) мен Данияр Шамшаевке (73 кг) тиесілі. Екі балуанымыз да рейтингте 15-орында тұр.
Ал Түркиядағы жарыста Қазақстан құрамасы сапынан жалғыз қола жүлдені жеңіп алған Нұрқанат Серікбаев әлемдік рейтингте 15 саты жоғарылап, 60 кило салмақ дәрежесінде 36-орынға көтерілді. Өзге салмақтағы балуандарымыздың рейтингіне тоқталар болса, Ғұсман Қырғызбаев (66 кг) – 24, Абылайхан Жұбаназар (81 кг) – 22, Дидар Хамза (90 кг) – 24, Нұрлыхан Шархан (100 кг) – 24, Әділ Оразбаев 41-орында келеді.