Астанада құрғақ шөп пен қамыс өртенді
<p class="p1" style="text-align: justify;"><span class="s1">Астана қаласында табиғи өрттерге қарсы іс-шаралар жоспары бекітілді. Бұл туралы мемлекеттік өрт бақылау басқармасының бастығы хабарлады, деп жазады <a href="/" target="_blank" rel="noopener noreferrer">Egemen.kz</a>.</span></p>
Елордадағы өрт мәселесі Астана қалалық коммуникациялар қызметі алаңында өткен баспасөз мәслихатында көтерілді. Спикердің айтуынша, өткен жылы құрғақ шөп пен қамыстың өртенуі бойынша 313 оқиға тіркелген.
«Бір аптаның ішінде 1 500 шаршы метрден асатын аумақта құрғақ шөп пен қамыстың өртенуі бойынша 6 оқиға тіркелді. Өткен жылы 313 жағдай тіркелген еді. Орман және дала өрттерінің алдын алу мақсатында биыл елорда аумағында табиғи өртке қарсы іс-шаралар жоспары әзірленді. Қала шекарасының периметрінде 6 бағыт бойынша жылжымалы күзет бекеттері ашылды», деді Еркін Отарымғалиұлы.
Осы орайда өрт бақылау басқармасының бастығы қауіпсіздік ережелерін назардан тыс қалдырмаудың маңыздылығына тоқтала кетті:
- кез келген ашық от көзімен жұмыс істегенде сақ болыңыз;
- жеке орналасқан тұрғын үй маңындағы аумақтарды уақытылы тазалап тұру керек;
- табиғат аясына шыққанда сіріңкені абайлап қолданып, темекі қалдығын тастамау керек;
- балалардың сіріңке және отпен ойнауына жол бермеңіздер;
- аң аулау кезінде жанатын материалдарды қолданбау қажет;
- ғимараттардың жанында от және қоқыс жағуға болмайды;
- табиғат аясына демалысқа шыққанда жаққан жалынды толық сөндіріп кету керек. Себебі шала сөнген от өртке әкелуі мүмкін;
- шыны ыдысты және сынған әйнекті қалдырмаңыздар. Өрт басталған жағдайда болса сумен, ағаштың бұтағымен немесе құм себу арқылы сөндіруге тырысу қажет.