Камчаткада Шивелуч жанартауы атқылап, елді мекенді күл басты
<p style="text-align: justify;">Сейсенбіге қараған түні Шивелуч жанартауы 15 шақырымдай жерге күл атқылады, деп хабарлайды <a href="/" target="_blank" rel="noopener noreferrer">Egemen.kz</a> Синьхуа ақпарат агенттігіне сілтеме жасап.</p>
РҒА ҚШБ вулканология және сейсмология институтының директоры Алексей Озеровтың айтуынша, Шивелучқа ең жақын орналасқан елді мекен - Ключи кентінде мұндай көлемде күлдің түсуі соңғы рет 1964 жылы тіркелген. Қазір оның қалыңдығы шамамен 8,5 см жеткен.
Күл Шивелучтан солтүстік-батысқа қарай 500 шақырымға созылып, ары қарай таралып жатыр. Қазір Ключи мен Козыревск ауылдарын күл басты. Милковский, Тигиль, Елизовский, Быстрин аудандарында және Петропавл-Камчатскіде де тура сол құбылыс қайталануы мүмкін.
Ауа-райының қолайсыздығына байланысты жанартауды бейнебақылау қиын болып тұр.
Шивелуч - Камчаткадағы ең үлкен жанартаулардың бірі. Жанартаудың биіктігі - 3 283 метр. Ол үш негізгі құрылымды қамтиды: Ескі Шивелуч жанартауы, ежелгі кальдера және белсенді Жас Шивелуч жанартауы.