Жасыл алаңды жаңарту бағдарламасы
<p style="text-align: justify;">Бұқаралық спортты дамытуға бағыт­талған Мемлекет басшы­сы­ның тапсырмасын орындау мақсатында Қазақстан футбол федерациясы елімізде футбол алаңдарын қай­­та жаңарту бағдар­ламасын енгізеді.</p>
ҚФФ баспасөз қызметінің мәліметі бойынша, бағдарлама 2023-2024 жылдар аралығында ФИФА және УЕФА-ның қолдауымен жүзеге асырылады. Сонымен қатар бағдарлама аясында аймақтық атқару органдарына бұқаралық футболға арналған және бюджеті төмен футбол алаңдарының құрылысы үшін жасанды алаң қайтарымсыз негізде төселеді.
«Бағдарламаның негізгі мақсаты – балалар-жасөспірімдер және бұқаралық футболды дамыту әрі насихаттау жолында қызмет атқаратын аймақтарға қолдау көрсету. Ең алдымен халық көп қоныстанған аймақтарда реновацияны қажет ететін футбол алаңдары енгізіледі. Жоба футбол алаңдарын қайта жандандырып қоймай, елімізде бұқаралық футболды дамытуға үлкен күш береді», дейді ҚФФ президенті Әділет Барменқұлов.
Қазақстан футбол федерациясы футбол алаңдары үшін стандарттар мен талаптарды әзірледі. Жобаға қатысу үшін жергілікті атқару органдарының атынан спорт нысандарының басшылары ҚФФ-ға 2023 жылдың 15 мамырына дейін өтініш білдіруге тиіс.
Барлық сұрақ бойынша келесі нөмірге хабарласыңыздар: +7 (7172) 79-07-80.