Іріктеуді жеңіспен бастады
<p style="text-align: justify;">Бұл күндері Шымкентте теннистен 16 жасқа дейінгі қыздар арасындағы Азия және Тынық мұхиты аймағы бойынша әлем чемпионатының іріктеу турнирі өтіп жатыр.</p>
Жарыстың алғашқы күні еліміздің жасөспірім қыздар құрамасы Вьетнам теннисшілерімен шеберлік байқасып, қарсыластарынан үш ойында да басым түсті – 3:0. Бірінші бәсекеде Ариана Гогулина Нгуенді 6:1, 6:0 есебімен тізе бүктірсе, екінші матчта Полина Слепцова Нгоны 6:1, 6:3 есебімен жеңді. Ал жұптық сында Ариана Гогулина мен Анастасия Крымкова вьетнамдық апалы-сіңлілі Нголарды екі сетте – 6:3, 6:0 нәтижесімен қапы қалдырды.
Сонымен қатар кеше жерлестеріміз Иран теннисшілерінен де айласын асыра білді. Бірінші кездесуде Анастасия Крымкова Анастасия Атфиді екі сетте – 6:3, 6:3 есебімен жеңсе, екінші ойында Ариана Гогулина аттасы Ариана Язданиді де дәл сондай есеппен жеңді – 6:3, 6:3. Осылайша, Ярослава Шведованың шәкірттері мерзімінен бұрын турнирдің ширек финалына шықты.