Өнерпаздар бас қосқан күн
<p style="text-align: justify;">Бұл жолы да Өнер музейінде өтіп жатқан «Музей түні» халықаралық акциясына жиналған жұрттың қарасы аз болмады. Күмбірлете күй төккен дәулескер күйші де, жезтаңдай әнші де музейлердің маңынан табылды. Қылқалам шеберлерінің де бастары қосылып, мәре-сәре болысты.</p>
Өнер музейінің «Музейдегі экспонат» атты бөлімін тамашалауға келген көрерменді домбырашылар күймен қарсы алды. Балдырғандар да би билеп, ән салды. Жауһар дүниелер қойылған сөрелерді қызықтаған ел Надежда Хабарованың қыш ыдыстарын өңдеудегі шеберлігін көріп, таңдай қағысты. Төргі залда компьютерлік графика әуесқойлары «Digital art» байқауында жаңа технологияның ғажап мүмкіндіктеріне тәнті болды. Үлкен залда музей жобаларының ең белсенді қатысушылары марапатталды. Олардың ішінде суретшілер, музыканттар, шығармашылық ұжымдардың жетекшілері бар.
– Біздің бабадан қалған мұрамызды сақтап келе жатқан музейдің орны ерекше. Байырғы өнердің өрнегін сақтап отырған музейдің жұмысы жемісті болсын. Бүгінгі болып жатқан «Музей түні» шарасы көрермендерге рухани ләззат сыйласын, – деді Мәдениет, спорт, туризм және ақпарат қызметкерлерінің қазақстандық салалық кәсіптік одағы облыстық филиалының төрағасы Түсіпхан Түсіпбеков.
Мәдени шара барысында суретшілер көрермендердің портреттерін салып, қонақтарға тарту жасады. Музей қонақтары модель ретінде «Сен – басқасың», «Сен – осындайсың» және «Үздік қолтаңба» байқауларына қатысып, түрлі сыйлықтарға ие болды.
– Музей – біздің қара шаңырағымыз. Қай уақытта болсын өнер туындымызды арқалап осы мәдениет ошағына келеміз. Бұл рухани шаңырақ суретшілердің көрмелерін өткізіп, қылқалам шеберлеріне қолдау көрсетіп отырады, – деді суретші Құдаш Нұрсадықов.
Бұл күні өңірдегі өзге де музейлерде қызыққа толы танымдық іс-шаралар өтіп жатты.
Өскемен