Ән-жырым саған, туған ел!
<p style="text-align: justify;">Әулиеатада Қазақстанның халық әртісі, Мемлекеттік сыйлық­тың лауреаты, белгілі композитор Алтынбек Қоразбаевтың 75 жылдық мерейтойына орай «Ән-жырым саған, туған ел!» атты шығармашылық кеш ұйымдастырылды.</p>
Ән әлемінің корифейіне арналған іс-шарада белгілі әншілер композитордың шығармаларын орындап, өнер иесіне құрмет көрсетті.
Алтынбек Қоразбаевтың шығармашылығына арналған кеш аясында «Ән-жырым саған, туған ел!» атты ІІІ халықаралық эстрадалық әншілер байқауы өтті. Облыс әкімдігінің қолдауымен ұйымдастырылған байқауға жиырмаға жуық жас өнерпаз қатысты.
Байқау қорытындысында әулиеаталық жас талант Дулат Жасұзақ бас жүлде иегері атанса, шулық Ербосын Қасымбек бірінші орынға лайық деп танылды. Жер жаннаты Жетісу жерінен келген «Браво» дуэтіне екінші орын бұйырса, маңғыстаулық Азамат Амангелдіұлы үздік үштікті түйіндеді.
Өңір басшысы Нұржан Нұржігітов халықтың құрметіне бөленген композиторды мерейтойымен құттықтап, ізгі тілегін арнады.
«Қасіреттен қан жұтқан қара шалдың шерін тарқатып, қара кемпірдің зарын жеткізген сіздің өнеріңізге халық әлдеқашан жоғары бағасын беріп қойған. Туған жеріңізде де еселі еңбек етіп, жерлестеріңіздің ықыласына бөлендіңіз. Сіздің әндеріңіз қай кезде де жұрттың жадында сақталатыны даусыз. Өнер биігіне шыққан өзіңіздей тұлғамен қашанда мақтанамыз. Жас ұрпаққа береріңіз әлі де көп екені ақиқат. Елдің ықыласына бөленіп, аман жүріңіз», деді Н.Нұржігітов.
ТАРАЗ