Интернет-банкингті меңгергендер

Қазір барлық дерлік банк­тің мо­бильді қосымшасы жұ­мыс істейді. Қар­жы институты басшылығы да соған үлкен мән беріп отыр. Олар үшін қа­зір банктің экожүйесін дамыту, со­ған орай мобильді банкингті жоғары деңгейде қалыптастыру, қолайлы әрі тиімді онлайн жүйе арқылы клиент тарту өте маңызды.

Finprom.kz мәліметі бо­йынша «Google Play»-дегі «Қаржы» секто­рында биыл қаңтар-наурыз аралы­ғында «Kaspi.kz», «Jusan» және «Halyk Bank» мобильді қосымшалары таны­малдылық тұрғысынан көш бас­таған. Бұл банктердің шығандап алға шығуы заңды да. Өйткені атал­ған қаржы ұйымдары кейінгі жылдары өз қосымшаларын ұдайы же­тілдірумен болды, мемлекеттік органдармен сәт­ті интеграция жасады және сер­вистерді дамытуға көп көңіл бөлді. Мысалы, «Jusan» таяуда ғана өз мобильді қосым­шасын толық жаңартты. Оның аясында дизайны да, функциясы да жаңғырды, тиісінше пайдаланушылар үшін қо­лайлы бола түсті.

Жоғарыда атап өтке­ні­міз­дей, қа­зіргі кезде банк­тер мобильді қосым­шада тек банк қызметтерін ғана тіркеп қоймайды, сонымен бірге то­лыққанды экожүйе ұсынуға тырысады. Мәселен, «Kaspi» және «Halyk» қосымшалары арқылы түрлі қызметтер ақы­сын төлеу, алуан түрлі құ­жаттар жүктеп алу­­мен қатар, жеке кәсіпкерлікті тір­кеу, жүр­гізу мүмкіндігі де бар. «Jusan Bank»-те де сервис жоғары дәре­жеде жетіл­дірі­л­ген. Өзгелерден бір ерек­ше­лігі, мұн­да бағалы қағаздар на­ры­ғына шығу үшін инвес­тициялық шот ашуға болады.

Қазір банк пен қаржы қыз­мет­терінің цифрлануы жалпы эко­но­миканың ажырамас бөлшегіне айналып келе жатыр. 2022 жылы қолма-қолсыз жасалған операциялар құрылымындағы онлайн-операция үлесі бойынша 64,6 пайызды, көлемі бойынша 82,5 пайызды құраған. Күн сайын ел тұрғындары орташа есеппен алғанда тікелей цифрлы банкинг көмегімен 15,2 млн операцияны жү­зеге асырады. Ондағы сома көлемі 234,7 млрд теңгеден асып кетеді.

Ranking.kz сарапшыла­рының айтуынша, бұл үрдіс тек Қазақстанға ғана тән емес. Жаһандық цифрлық бан­­­кинг пайдаланушылары 2024 жыл­ға қарай 3,6 миллиардқа жетеді деп болжанып отыр. Мобильді бан­кинг­ті пайдаланушылардың 94 па­йызға жуығы цифрлық банкинг қыз­меттеріне айына кемінде бір рет қол жеткізетінін айтады. Мысалы, АҚШ-та банк­тік шот иелерінің шамамен 89 пайызы өз қаржысын басқару үшін мобильді бан­кинг­ті пайдаланады.

Қазақстандағы жетекші банктердің мобильді қосым­шалары – тек негізгі банктік қызметтердің жиынтығы ғана емес, жалпы көптеген түрлі қызметтер мен мүмкіндіктерді қамтитын үлкен экожүйе. Бұған сай елде цифрлық сауаттылық та айтарлықтай жоғары көр­сеткішке ие. Мәселен, 2022 жыл­­дың қорытындысы бойынша бұл көр­сеткіш 88,3 пайызға жетіпті. 2021 жылы цифрлық сауаттылық деңгейі 87,3 пайыз болса, 2020 жылы – 84,1 пайыз, 2019 жылы – 82,1 пайыз, 2018 жылы 79,6 пайыз болған.

Халық арасында қолма-қол ақша­сыз операцияларды жүзеге асы­рудың ең көп тараған тәсілі – интер­нет және мо­бильді банкинг. Қолма-қол ақшасыз жас­алған он операцияның сегізі он­лайн түр­де жүр­гізіледі. Ин­тер­нет және мо­бил­ьді бан­кингтің басты ар­тық­­шылықтары мыналар:

- уақыт үнемдеу – банк бөлімше­леріне барудың, кезекте және кепте­ліс­те тұрудың қажеті жоқ. Бұл кез келген операцияны өңдеуді айтарлықтай жылдамдатады.

- мобильділік – жүйеге интернетке кіруге мүмкіндігі бар кез келген жерде, соның ішінде ұялы телефондар, планшеттік ком­пьютерлер және бас­қа құ­рыл­ғылар арқылы шектеусіз қол­жеткізуге болады.

Икемділік – тәулігіне 24 са­ғат, аптасына 7 күн қол­же­тімді.

Ақша үнемдеу – төлем мен аударымдарды өңдеу шығыны азаяды.