Құндылыққа құрмет
<p style="text-align: justify;">Сыр өңірінде Мемлекеттік рәміздер күніне орай жүзге жуық іс-шара өтті. Атаулы күн аясында «Жас Ұлан» балалар мен жасөспірімдер ұйымы мен «Жас сарбаз» қозғалысының мүшелері сап түзеді.</p>
Байқоңыр қаласында жалпыхалықтық патриоттық іс-шаралар ұйымдастырылып, барлық ауданда Елтаңба авторы, сырбойылық Жандарбек Мәлібековтің еңбегі кеңінен насихатталды. Мемлекеттік Ту авторы, суретші Шәкен Ниязбековтің 85 жылдығына арналған іс-шаралар, патриоттық акциялар, көрмелер мен танымдық сағаттар өткізілді.
Атаулы күнге арналған ауқымды жиын облыс орталығындағы Рәміздер алаңында өтті. Қай мемлекеттің де мәртебесін айқындайтын басты құндылық – шекарасы, астанасы және Мемлекеттік рәміздері екенін атап өткен облыс әкімі Нұрлыбек Нәлібаев жиналғандарды мерекемен құттықтады.
– Мемлекет басшысының «Қасиетті нышандарымызда қазақтың мың жылдық арман-тілегі, мақсат-мұраты түгел тоғысқан. Көк байрағымыз – мызғымас мемлекеттіліктің белгісі. Елтаңбамыз – азаттықтың айшықты көрінісі. Ал, Әнұранымыз – еркіндік пен елдіктің үні. Тәуелсіздіктің осы үш символы халқымызға ерекше рух береді. Өйткені, бұл – бабаларымыздың орындалған арманы», деген сөзінен еліміздің басты құндылықтарына деген ерекше құрметті көреміз. Рәміздерімізді елдігіміздің ұраны, патриоттығымыздың бастауы, Отанымыздың мақтаныш символы ретінде таныту бәріміздің борышымыз, – деді облыс әкімі.
Патриоттық іс-шарада Отан, атамекен, туған жер туралы әндер орындалды. Мемлекеттік Туды желбіреткен жеңіл көліктер мен мотошабандоздар шеруі көше бойлап жүріп өтті.
БАЙҚОҢЫР