Тәлімі терең туынды

Ата-аналардың назарын от­басылық құндылықтарға аудару, балалар мүддесін, олардың таң­дауы мен тілектерін құрметтеуге ша­қыруды мақсат тұтқан қойы­лым­ның негізгі өзегі – отбасын­дағы ахуал баланың жан-жақ­ты қалыптасуына әсер ететінін, табиғатпен үйлесімде болуы көк­жиегін кеңейтетінін көрсету.

Ертегінің басты кейіпкері – Қа­рагөз есімді қыз. Оның бо­лашақты болжай алатын қасиеті бар. Ерекше қыздың айрық­ша қабілетін қабылдай алма­ған айналасы одан безінеді. Тіпті қар­шадай қыз туған ауылынан қуылады. Отбасынан алшақ­тап, ауыл тұрғындарынан зәбір көр­ген Қарагөз енді кек алуға бел буа­ды. Осылайша, ол қаһарлы сиқыр­шы­ға айналады. Алайда махаббат пен ізгілік Қарагөзді ғана емес, ауылдағы барлық баланы қасаң қағидалар қамытынан құтқара­ды. Қазақ мифологиясының өзегі­нен нәр алған қойылымның жас жеткіншектер ғана емес, олардың ата-анасына да айтары көп.

«Педагогика саласында 25 жыл­­­дан аса тәжірибем болса да, бұл қойылымды дайындау оңай бол­ған жоқ. Балалар кәсіби актер бол­мағаннан кейін сахналық әр детальмен тәтпіштей жұмыс істеу­ге тура келді. Түрлі тәжірибе­ге бардық. Нәтижесінде, ізденісі­міз балаларға ұнады. Көздерін­­де жанған жалын, сахналық өнер­­ге деген құштарлық алдымыз­дан кездескен барлық қиындық­ты еңсеруге көмектесті. Тамаша ша­быт сыйлады. Жалпы, біз бұл шы­ғарманы бекер алған жоқпыз. «Алтын өлке аңызы» ертегісі ар­қылы ең әуелі ата-ана­ларға ой сал­ғымыз келді. Бала­ларымен қа­рым-қатынаста жібе­ріп жата­тын көптеген қателік пен кем­шілікті түзеуге сеп болсын дедік. Өздеріңіз куә болғандай, қойылымдағы Қарагөз есімді қыздың ерекше қабілетін, өзге­лер­ден ерекше мінезін айналасы қабылдаған жоқ. Соның сал­дарынан Қарагөз ауылдан қуы­лады. Бұл оны ашындырады да, қайырымды Қарагөз жауыз Жез­тырнаққа айналады. Оны қа­тыгез­діктен құтқарған туған хал­қы­­ның әні. Әннен қуат алған Қара­гөз баяғы қалпына оралады. Міне, осы оқиға арқылы біз кез кел­ген баланың ерекше қабілеті, мінезі болатынын көреміз. Соны әр ата-ана сол қалпында қабылдай білу­ге тиіс. Өзінің таным-түсінігіне икем­деуге тырысу, көппен бірдей ойлауға баулу баланың балғын санасында қарсылық тудырады. Ондай қарсылық тіпті кейде қа­тыгездікке да ауысуы мүмкін. Сол себепті де баланың табиғатын, болмысын өзгертуге ұмтылмай, ке­рісінше сол қалпында қабыл­дай білген жөн. Осы жағына абай ­болу керек дегенді айтқымыз кел­ді. Сол негізде ой салуға ұмтыл­дық», дей­ді қойылым режиссері Ләззат Сүлейменова.

«Самұрық-Қазына» ком­­­па­­­ниялар тобының бірың­ғай қа­­йы­рымдылық операторы «Sam­ruk-Kazyna Trust» әлеуметтік жо­ба­ларды дамыту қо­рының де­меу­шілігімен кө­рер­менге жол тарт­қан ертегіні сах­налауға «Заман­дас» отбасылық аула клубының 80-ге жуық тәр­бие­ленушісі, оның ішін­де жас актерлер, домбырашылар мен биші­лер қатысты.

«Бүгін біз әдемі аңызға қа­ны­­ғып, керемет ертегіні тама­шала­дық. Сонымен қатар сахнаның сә­ніне айналған балаларымыз­­дың жұлдызы жанғанына куә бол­дық. Біздің балаларымыз талантты ­әрі шынайы өнер көрсетті. Олар­ға болашақта табыс, денсаулық, сондай-ақ армандарының жүзе­ге асуын тілеймін», деді «Samruk-Kazyna Trust» қорының бас директоры Әлфия Әдиева.

12 жыл бойы елордалық «За­мандас» отбасылық аула клу­­бы әлеуметтік осал санаттағы бала­ларға түрлі шығармашы­лық, спорт­тық және білім беру сек­ция­лары мен үйірмелерде тегін оқуға мүмкіндік беріп келеді. Қоғамдық қор директоры Ләззат Алшынованың айтуынша, 2023 жылы клубқа 3000-нан астам бала мен ата-ана мүше болған.

«Біздің тәрбиеленушілер бос уақытында клубқа барып қа­­на қоймай, өз мақсаттарын жүзе­ге асыруға ұмтылады. Рес­пуб­лика­лық чемпионаттарда же­ңіп­маз атанып, кандидаттар мен спорт шеберлері болады, шы­ғар­машылық конкурстар мен жа­рыс­тарда топ жарады. «Ал­тын өлке аңызы» қойылымы – бір­неше ай бойы еңбек еткен ұйым­дастырушылардың, оқыту­шы­лар мен балалардың ұжым­дық жұ­мы­сының тағы бір жетістігі», деп атап өт­ті «Замандас 21» қо­ғамдық қо­ры­­ның директоры Ләззат Алшынова.

Иә, «Замандас» отбасы­лық аула клубының театр сту­дия­­­сын­дағы балалар мен оқы­тушы­лардың шығармашылығы – шын мәнінде сүйсінуге тұрарлық қа­жырлы еңбектің жемісі. Соның бірі – бүгінгі біз тамашалаған «Алтын өлке аңызы» ертегісі. Қо­­­йылымға қатысқан әр бала өз ке­йіпкерімен өмір сүріп, сах­на­ның сәнін кіргізді. Әсіресе бас­ты рөлдегі Жезтырнақ, Айша, Данай, Жаназар бейнелері көп­ші­ліктің қошеметіне бөленді. Эпи­зодтық рөл болса да Қосаяқ бейнесіндегі балдырғанның ойы­ны жан-жақты ізденісімен риза қылды. Сондай-ақ «Алтын өлке аңызы» спектаклінің премьерасында ерекше есте қалғаны домбырашылардың сахнада ту­дырған қызықты музыкалық ше­шімдері десек, артық айтқан­дығымыз емес. Талғаммен таң­далған музыка көпшілікті тәнті етті. Ал көрермендердің шынайы ықыласы мен қошеметі жас әртіс­терге қанат бітірді.

«Менің аты-жөнім – Үміт Дүй­­­сенбек. Актриса бол­сам де­ген ар­манымды жүзеге асы­руға кө­мектескен, сахна өне­ріне бау­­лыған ұстазым, бүгінгі қойы­­лымның режиссері Ләззат Сү­лей­меноваға ерекше алғыс білдір­гім келеді. Сахнадағы іс-қимылым­ды, сөйлеу мәнерін – барлығын ма­ған сол кісі үйретті. Мен ойнаған Жезтырнақ – негізгі кейіпкердің бірі. Бұл рөл арқылы адам міне­зінің сан қырлылығын, адам қан­­ша қатыгез болса да, бәрібір мейі­­рімге, қолдауға, қамқорлыққа зәру екендігін айтқым келді. Әри­не, бұған дейін де бірнеше рөл­де ойнадым. Алайда бү­гінгі ертегінің орны ерекше. Ерек­шелігі сол – қойылымымыз кө­рерменді ойлантып қана қой­майды, адам жанына тереңнен бой­лауға үйретеді», деген жас өнер­паздың сөзін қойылымда жас батыр Жаназар бейнесінде көрінген дарынды оқушы Архат Жолдыбай бы­лай сабақтады: «Атым Архат, жасым 15-те. Бұл – менің сахналық өнердегі ал­ғашқы жұмысым. Әсерімді сөзбен айтып жеткізу мүмкін емес. Осы сәтті бақытты сәт деп айтар едім. Шынымен, қойы­лымға дайындалған кез біз­дің әрқайсымызға ұмытылмас есте­ліктер сыйлады. Жаңа дос­тар таптық. Ең бастысы, мен бұған дейін тіпті өзім бай­қамай келген бойымдағы актер­лік қабі­леттің барын білдім. Қат­ты ұна­ды. Болашақта да осы жұ­мыс­ты жалғастырып, сахнада қы­­зықты образдар тудырғым келеді. Киноға түссем деген арманым да бар», деді Архат ағынан ақтарылып.

Жас дарындардың сахнадағы жұлдызын жағып қана қоймай, олардың тәрбиесі мен өмірлік ұс­танымдарының айқындалуына, тұлға ретінде өздерін жан-жақ­ты дамытуына септесіп, өлшеусіз ең­бек сіңіріп келе жатқан «За­ман­дас» қоғамдық қорының шын мәнінде замандастарына ұсынар тәлімі мен тағылымы мол. Оны, әсіресе, сахнада жалын атып өнер көрсеткен жеткіншектердің отты жанары мен баласының өне­рін мақтан тұтқан әр ата-ана­ның толассыз соғылған ша­палақ үнінен айқын сезгендей бол­дық. Ал Ұлы даланың ұлттық құн­дылықтарын оқиға өзегіне айналдырған қойылымның кіш­кентай көрермендер ғана емес, ересектерге де айтары мол.