Жоғары топқа шығудан үмітті
<p style="text-align: justify;">13-19 тамыз күндері Тайландтың бас шаһары – Бангкокта баскетболдан әйелдер арасындағы Азия кубогі (Б дивизионы) додасы­ның шымылдығы түріледі. Сары құрлық бәсекесіне қатыса­тын еліміздің ұлттық құрамасы бұл күндері елордадағы «Тарлан Арена» спорт кешенінде оқу-жаттығу жиынын өткізіп жатыр. Азия біріншілігінің қарсаңында ұлттық құраманың бапкер­лері мен федерация басшылығы команданың дайындығы туралы баяндап берді.</p>
Баскетболдан әйелдер арасындағы ұлттық құраманың менеджері және бапкерлер құрамының мүшесі Азамат Абдулкәрімовтің айтуынша, Қазақстан құрамасы биылғы Азия кубогінде Б дивизионнан А лигасына шығуды мақсат етіп отыр.
«Елордада оқу-жаттығу жиынын өткізіп жатқанымызға бір аптадан асты. Алда әлі толық тағы бір апта жаттығамыз. Өткен жетіде қыздарымыз дене даярлығы жаттығуларын өткізсе, бұдан былай көбірек тактикаға көңіл бөлеміз. Елімізде әйелдер баскетболы енді-енді қанат жайып, дамудың даңғыл жолына түсіп келе жатыр. Ішкі чемпионатта ойнайтын командалардың да қатары жыл сайын артып келеді. Бұл, әрине, ең бірінші кезекте ішкі бәсекелестікті арттырады. Ал бәсеке бар жерде кез келген сала алға қарай жылжитыны айтпаса да түсінікті. Соған қарамастан, алдағы Азия кубогі жарысында жоғары топқа қосылу үшін бар күшімізді саламыз. Қыздарымыз Бангкокта Иордания, Тайланд және Шри-Ланка құрамаларымен шеберлік байқасады. Топтағы басты қарсыласымыз Иордания құрамасы болмақ. Тайланд спортшылары да өз алаңында, жанкүйерлерінің қолдауы аясында ойнайтын болған соң, олар да аянып қалмайтыны анық», деді А.Абдулкәрімов.
Ал баскетбол федерациясының президенті Абай Алпамысов ұлттық құраманың ішкі проблемасына тоқталып, қаржының аздығына байланысты спортшылар сары құрлық бәсекесінің алдында бір ғана оқу-жаттығу жиынын өткізуге мәжбүр екенін айтты.
«Қыздарымыз Азия кубогі жарысы алдында жоспарланған оқу-жаттығу жиынын өткізіп жатыр. Негізі мұндай байрақты додалардың алдында спортшылар кемінде екі-үш жаттығу жиынынан өтуі керек. Шетелдерде шынығып, мықты құрамалармен спарринг-жаттығу өткізгені қыздарымызға алдағы маңызды жарыс алдында үлкен септігін тигізер еді. Біз қазір демеуші, қосымша қаржы тарту бойынша жұмыс істеп жатырмыз. Алдағы уақытта жаттығулар санын көбейтуге тырысамыз», деді федерация басшысы.
Баскетболдан әйелдер арасындағы Азия кубогінің А тобында Индонезия, Иран, Малайзия және Моңғолия құрамалары күш сынасса, Қазақстан құрамасы Б тобында Шри-Ланка, Тайланд және Иордания қыздарымен шеберлік байқасады. 8 құрама ішінде жеңіске жеткені 2025 жылы өтетін Азия кубогінің А дивизионына жолдама алады.
Қазақстан құрамасының
ойындар кестесі:
13 тамыз 2023: Қазақстан – Шри-Ланка
14 тамыз 2023: Тайланд – Қазақстан
15 тамыз 2023: Қазақстан – Иордания
17-18-19 тамыз: Плей-офф кезеңі