Қос жүлдеге қол жеткізді
<p class="2018-" style="text-align: justify;">Бұл күндері Әзербайжанның бас ша­һары – Бакуде нысана көздеуден 53-әлем чемпионаты өтіп жатқаны белгілі. Байрақты доданың кезекті жарыс күнінде жерлестеріміз үздік нәтиже көрсетіп, әлем чемпионатындағы тарихи жүлдеге қол жеткізді.</p>
Спортты дамыту дирекциясы баспасөз қызметінің мәліметі бойынша, әйелдер арасында 10 метрден жылжымалы нысана көздеудің финалына екі жерлесіміз – Зухра Ирназарова мен Александра Сәдуақасова шығып, бас жүлдені сарапқа салды. Аса тартысты өткен финалдық сайыста Зухра отандасы Александрадан 6:3 есебімен басым түсіп, әлем чемпионы атанды. Ал қола жүлде украиналық Галина Авраменкоға бұйырды.
Бұған дейінгі ересектер арасындағы әлемдік додада ел спортшылары бірде-бір жүлде алмаған еді. Барлық жетістік тек жасөспірімдер мен жастар деңгейінде тіркелген. Ал кеше ел қоржынына бірден қос медаль түсті. Бакуде күміс жүлдеге ие болған Александра Сәдуақасова былтыр Францияда өткен жастар арасындағы әлем чемпионатында топ жарған болатын.
Қазіргі таңда Қазақстан құрамасының еншісінде 3 жүлде бар.