Жалған сусын жасаушылар ұсталды
<p style="text-align: justify;">Қаржылық бақылау агенттігінің баспасөз қызметі хабар­лаған­дай, аталған агенттік­тің Шым­­кент қаласы бойынша департаменті үшін­ші мегаполисте танымал энергетикалық сусынды жасырын түр­де шығарған цехты анықтаған. Департамент бизнес құқық­тарын қорғау және көлеңкелі экономикамен күрес бойынша жүргізіп жатқан жұмыстары аясында заң бұзушылықтың жолын кесті.</p>
Қалалық санитарлық-эпидемиологиялық бақылау департаментінің мамандары және сауда маркасының құқық иеленушінің өкілдері жүргізген жедел-іздестіру іс-шаралары барысында 21 мыңнан астам құты – контрафактілік сусынның дайын өнімдері, тауар белгісі бар 54 мыңнан астам бос банкалар, энергетикалық сусынды құюға арналған жабдық, сия бүріккіш жапсырма, орау құрылғылары, қақпақтар, құрғақ қоспалар (лимон қышқылы, кофеин, сода, бояғыштар, қант, қышқылдықты реттегіштер) тәркіленді. Келтірілген шығын көлемі 37 млн теңгеден асады.
Ұлттық сараптама орталығының микробиологиялық зерттеу хаттамасына сәйкес, тәркіленген сусынның құрамында рұқсат етілген мөлшерден екі есе жоғары зең мен ашытқы анықталған. Бұл өнім тұтынуға жарамсыз, өйткені ол адам денсаулығына, әсіресе жас ағзаға зиян келтіреді. Осы факті бойынша сотқа дейінгі тергеу басталды.
ШЫМКЕНТ