Жолың болсын, шахмат керуені!
<p style="text-align: justify;">Кеше Көкшетауға еліміздің барлық ай­­мағында шахмат спортын дамытуды және насихаттау­ды мақсат еткен «Шах­мат керуені» рес­пуб­ли­калық жо­бас­ы­ның өкілдері келді.</p>
Облыс орталығындағы Тәуелсіздік алаңында Көкше жұртшылығы ақсүйек өнердің ақсұңқарларын құшақ жая қарсы алып, кездесу рәсімі өткізілді. Ақыл-ойдың керуені еліміздің барлық өңірін аралап шықпақ. Бұл жолғы сапар Петропавл, Қостанай, Қарағанды қалалары арқылы жалғаспақ. Сүмбіленің ақ жауыны құйып тұрса да, кездесуге келушілер қатары көп. Осыған қарап-ақ жерлестеріміздің шахмат спортына деген ыстық ықыласын аңғаруға болады. Аға буынның айтуына қарағанда, осы өнерге ынтық жастардың қатары күн сайын өсіп келеді.
«Шахмат ойынына Мемлекет басшысы Қасым-Жомарт Тоқаев мейлінше назар аударып отыр, – деді облыстық мәслихаттың әрі облыстық шахмат федерациясының төрағасы Бейбіт Жүсіпов. – Бүгінде елімізде 200 мыңнан астам адам спорттың осы түрімен айналысса, олардың төрттен бірі – балалар. Биылғы қыркүйек айынан өңірдегі жалпы білім беретін мектептерде шахмат факультативтік сабақ ретінде өткізіле бастады. Қазір облыстағы 753 үйірмеде 7 мыңға жуық оқушы шахмат спортымен шұғылданады.
Керуенді қарсы алып, көзайым болған көпшілік шахмат жарысын ұйымдастырды. Жеңімпаздар 10 қараша күні Түркістан қаласында өтетін ақтық сынға жолдама алады.
КӨКШЕТАУ