Қадір мен қасиет

Әулет иесі Сәрсенғали Са­ғын­дықовтың мамандығы – элек­трик. Ол қазір «Жезқаз­ған­түстімет» ӨБ-ның электр жаб­дықтарына сервистік қызмет көр­сету басқармасында еңбек етеді. Бұлай жазғанымыз дұрыс та емес шығар. Өйткені ол еңбек жолын бастаған осы ұжымда 45 жылдан бері табан аудар­мастан жұмыс істеп келеді емес пе? Мамандығын да өзгерткен емес. Әу баста жұмысқа электрик болып орналасып еді, әлі сол қалпы. Үйренуші болып бастаған мамандығының қыр-сырын әбден меңгергені сон­шалық, бүгінде ол – 7-санатты электрик. Бар өзгеріс сол ғана. Мамандықты меңгеру, еңбек жолында өсу деген осы.

«Жұмыс орнын ауыстыру туралы ойыма да кіріп шық­папты. Рас, «жоғары жалақы аласың» деп өздеріне шақырған ұжымдар болған. Бірақ өзім жас­тайымнан бірге жүрген әріп­тестерімді қимадым. Жалақы табылғанмен, жанымдағыдай жора-жолдастар жаңа жерден табыла ма, жоқ па деп ойладым, – дейді Сәкең. – Ақша дегеннің көбейген сайын жетпейтін ауруы болады. Өз ортаңда абыройлы болып жүргеннен артығы жоқ. Балаларыма да осыны айтып отырамын».

Зайыбы Бибісара екеуі үш ұл тәрбиелеп өсіріпті. Үл­кені Төлепберген әкесіне тар­тып энер­гетика саласын таң­дады. Ал­ғашында Жезқазған аграр­лы-техникалық кол­леджінд­е электрлі және электр­механикалық жаб­дықтарды тех­никалық пайдалану мен жөндеу мамандығы бойын­ша оқыған Төлепберген кейін Ө.Байқоңыров атындағы Жез­қазған университетінде электр энергетикасы мамандығы бо­йынша білімін шыңдаған кө­рінеді. Қазір Т.Сағындықов – «Жезқазғантүстімет» ӨБ-ның электр жабдықтарына сервистік қыз­мет көрсету басқармасының тау-кен автоматика цехының бас­тығы.

«Бастық» деген атымыз ғана, әйт­песе орындықта ші­ре­ніп отыратын шенеунік емеспіз, электриктермен, басқа да мамандармен бірге өндірістің бел ортасында жүреміз, – деген Төлепберген лауазымы қа­ра­­пайым қызметке лайық екенін түсіндірді. – Жұмысты үйлес­тіру, көзін таба білу, дер мез­гілінде әрекет ету және сондай сансыз жұмысқа басшылық жасау – менің міндетім».

Сәрсенғалидың екінші пер­зенті Айдос болса, «Транко Экспресс» ЖШС Сәтбаев филиа­лында автокөлік жүргізушісі, кенжесі Жандос – Жылданды кенішіне қарасты Сарыоба шахтасында электрслесарь.

«Ұлдардың үшеуі де аяқ­танған. Айгүл, Әйгерім, Айға­ным есімді үш келінім бар. Олардан 10-нан аса немере сүйіп отырмыз. «Құдай берерін тоқ­татпасын» деп тілеп те қоя­мыз. Немеренің алды азамат болып та жатыр. Үлкен немереміз Ер­асыл – студент. Лицейді үздік тәмамдап, жоғары оқу орнына түсіп, грант иегері атанды. Ұр­пағымыздың жаман аты шық­пай, қатарынан қалмай жүр­гендерін көргенде тәубе дейміз, оларға қарап өмірге сүйі­неміз», деген Сәкең шөбере сүйе­тін күннің де алыс емес еке­нін ишарамен жеткізді.

Шаңырақтың отанасы, қа­ла­дағы №10 балабақшаның ас­пазы Бибісара Қапанқызы дас­тарқанның дәмін келтіруді ешкімнен сұрамайтыны хақ.

Сәтбаев қалалық «Мерейлі отбасы» байқауында бас жүлдені жеңіп алған Сағындық әулеті облыстық додаға да қатысып, бақ сынап, «Өнегелі отбасы» аталымының иегері атанды.

Мәселе – марапатта емес. Көпшіліктің ортасында қаді­ріңнің бар екенін сезіне білуден асқан бақыт жоқ. Сәрсенғали Сағындықовтың әулеті – сондай бақыт бұйырған әулет.

Ұлытау облысы,

Сәтбаев қаласы