Пиреней түбегінде жеңіске жетті
<p style="text-align: justify;">Еліміздің жас теннисшісі Ясмин Дүй­сембаева Испанияның Санта Понса қаласында 12 жас­қа де­йін­гілер арасында өткен екін­ші санат­тағы Tennis Europe тур­ни­рінің чемпионы атанды.</p>
Қазақстан теннис федерациясы мәліметі бойынша, Ясмин финалда Болгария өкілі Майя Михованы 7:5, 6:2 есебімен жеңіп, бас жүлдені қанжығасына байлады. Ал ұлдар арасында бақ сынаған тағы бір отандасымыз Ахмади Маханов финалға дейін жеткенімен, чемпиондық матчта корт иесі Томас Мартинге жол беріп қойды – 1:6, 1:6.
Ахмадидің жекелей сында жолы болмағанымен, жұптық сайыста бағы жанды. Отандасы Балқан Нұрдәулетпен бірге жұп құрап, турнирдің соңғы бәсекесінде словакиялық Леонард Нипц пен украиналық Егор Романют жұбынан екі сетте 6:1, 6:2 есебімен басым түсіп, турнир жеңімпаздарының қатарына қосылды.
Сонымен қатар қыздар бәсекесінің тағы бір финалында ойнаған жерлесіміз Әдемі Әлсейпулова нидерландтық Пиппа Фенниспен бірге ақтық сында Испания қыздары – Пелас және Бельтраннан басым түсе алмады – 3:6, 4:6.