Сазды әлемімен сүйсінтті
<p style="text-align: justify;">Астанадағы Еркеғали Рахмадиев атындағы Мемлекеттік академиялық филармонияда көрнекті композитор, Мемлекеттік сыйлықтың лауреаты Төлеген Мұхамеджановтың «Менің жыр әлемім» атты шығармашылық кеші өтті.</p>
Рухани келісім күніне арналған әсем сазға толы кеште елордалық филармонияның симфониялық оркестрінің, камералық хордың және солистердің орындауындағы композитордың үздік шығармалары орындалды. Соның ішінде 1979 жылы жазылған «Махамбет» симфониялық поэмасын ерекше айтуға болады. Бұл туындыны кезінде Ресей Федерациясының Мемлекеттік симфониялық оркестрі орындаған. Драмалық шығарма жалынды жыршы Махамбет Өтемісұлына арналған.
Концерт барысында кеш иесінің «Қалың елім, қазағым, қайран жұртым», «Туған жер», «Дала», «Тағзым» және тағы басқа да шығармалары шарықтады.
Сондай-ақ Төлеген Мұхамеджановтың көңілдің қылын шертетін музыкасы бірқатар көркем фильмдер арқылы да жақсы таныс. Кеште тыңдармандарды композитордың Талғат Теменовтің «Махаббат бекеті», «Адамдар арасындағы бөлтірік», «Біздің қаланың кішкентай ханзадасы», Досхан Жолжақсыновтың «Біржан сал», «Құнанбай» фильмдеріне жазған сазды әуендері сүйсінтті.
Шығармашылық кеште Қазақстанның және Татарстанның халық әртісі, Мемлекеттік сыйлықтың лауреаты Нұржамал Үсенбаева, «Дарын» Мемлекеттік жастар сыйлығының лауреаты Алтынбек Әбілда, скрипкашы, Қазақстанның еңбек сіңірген қайраткері Бағдат Әбілханов, күйші Айбек Бекбосын өнер көрсетті.