Сайлауға дайындық талапқа сай ма?
<p style="text-align: justify;">20-25 қазан күндері Орта­лық сайлау комиссиясы төраға­сының орынбасары Конс­тантин Петров аудандар мен облыстық маңызы бар қалалардың әкімдері мен қалалық мәслихат­тар депутаттарын сайлауға дайын­дық аясында жергілікті комиссия­лар­ға құқықтық, әдістемелік, ұйым­дастырушылық көмек көрсету үшін Ақтөбе облысына барды.</p>
Ойыл, Қобда, Ырғыз аудандарында және Ақтөбе қаласында облыстық сайлау комиссияларының мүшелерімен кездескен ол әріптестерімен алдағы сайлауды ұйымдастыру мен өткізуге, үгіт-насихат қызметінің құқықтық реттелуіне, мүгедектігі бар азаматтардың сайлау құқықтарын қамтамасыз етуге, байқаушылардың, үміткерлердің сенім білдірілген адамдарының, бұқаралық ақпарат құралдары өкілдерінің жұмыс жағдайларына қатысты нақты мәселелерді талқылады.
ОСК төрағасының орынбасары аудандық сайлау комиссияларының учаскелік сайлау комиссиялары мүшелері үшін өткізген оқу іс-шараларына қатысты. Ұйымдастырылған оқу тренингтері шеңберінде учаскелік комиссияның дауыс беру күніне дейінгі және сайлау күнгі жұмысы бойынша тәжірибелік кейстерді пысықтауға, сайлау құжаттарының нысандарын толтыру тәртібіне, учаскелік комиссия мүшелерінің сайлау үрдісінің басқа қатысушыларымен өзара іс-қимылына басты назар аударылды. Іс-шараларға өңірдегі учаскелік сайлау комиссияларының 180-нен аса мүшесі қатысты.
Константин Петров алдағы сайлау науқандарына қатысатын пилоттық аудандар мен Ақтөбе қаласындағы сайлау учаскелерінің дайындығын да тексерді.
Биыл 29 қазанда 11 өңірдегі 21 округте шығып қалған депутаттардың орнына мәслихат депутаттарын сайлау өтеді, ал 5 қарашада қанатқақты аудандар мен облыстық маңызы бар қалаларда 45 әкім сайланады.