Қазақ, башқұрт – бір туған
<p style="text-align: justify;">Қазақстан мен Ресейдің «Ауыл шаруашылығы – қуат­­ты экономиканың не­гізі» атты ХІХ Өңіраралық ын­ты­­мақтастық форумы аясында Шығыс Қазақстан об­лы­сының әкімі Ермек Көшер­баев Башқұртстан Респуб­ликасы Премьер-министрінің орынбасары – Ауыл шаруашылығы министрі Ильшат Фазрах­ма­новпен екіжақты кездесу өткізді.</p>
Селекцияны, туризмді, ара шаруашылығын дамыту мәселелері талқыланды.
– Біздің өңірлер екі елдің өзіндік бал астаналары болып табылады. Тозаңдану, аналық бал басын дамыту, жаңа бал сұрыптарын жасау, сондай-ақ оларды өңдеу мәселелерінде біз көшбасшы болуымыз керек. Ол үшін барлық мүмкіндіктеріміз бар, – деді әкім Ермек Көшербаев. – Егер қажет болса, біз омарташыларымыздың бірлескен қауымдастығын құратын боламыз.
Бұл тұрғыда Ресейдің Башқұртстандағы бал араларын генетикалық сараптау бойынша жалғыз зертханасы қызығушылық тудырады. Айтпақшы, 250 мың ара ұясы бар және жеті мың тонна тауарлы бал өндіретін республикада сапалы бал беретін ортаорыстық тұқым – қара орман арасын өсіруге басымдық берілген.
Сонымен қатар логистиканың қазіргі заманғы бағыттарының өзектілігін ескере отырып, аймақ басшысы Башқұртстанның серіктестеріне Қытаймен шекаралас аудандарға жақын ШҚО аумағында бондтық қоймалар құруды ұсынды. Шығыс Қазақстан ҚХР-мен сауда жасау кезінде Башқұртстанның бизнес-топтары үшін логистикалық қызметтердің барлық түрлерін көрсетуге дайын.
Башқұртстан Республикасы Премьер-министрінің орынбасары – Ауыл шаруашылығы министрі соңғы екі жылдағы экономикалық қиындықтарға қарамастан, Башқұртстан қарқынды дамып келе жатқанын хабарлады. Ауыл шаруашылығы өнімдерін қайта өндіру дағдарысының проблемасы кейінгі уақытта жаңа өткізу нарықтарын, атап айтқанда Қытайға ашу арқылы шешілуде. Бұл орайда Шығыс Қазақстан облысы башқұрт тауарлары үшін транзиттік хабқа айналуы мүмкін еді.
– Біз жақын арада туризмді дамыту бойынша екі мыңға жуық жол бойындағы сервис нысанын салуды жоспарлап отырмыз. Башқұртстан қымыздың жүз түрлі түрін өндіреді. Бізде көшпелі мәдениет дамыған, осының бәрі елімізге келетін туристерге қызықты, – деп атап өтті Башқұртстан делегациясының басшысы.
Тараптар ШҚО-дан Уфаға Халықаралық бизнес апталығына, соның ішінде туризм саласында тәжірибе алмасу үшін мамандар жіберуге келісті.
Сондай-ақ Ермек Көшербаев башқұртстандық әріптестерін қараша айының соңында өтетін бүркітші фестиваліне қатысуға шақырды.
– Біз бәсекелеспеуіміз керек, керісінше, кооперациялануымыз керек. Шығыс Қазақстан инвесторлар үшін барлық қажетті жағдайды жасауға дайын. Біздің міндетіміз – бизнеске мүмкіндіктерді көрсету. Бұдан әрі кәсіпкерлер өздері әрекет ете бастайды, – деп қорытындылады Шығыс Қазақстан облысының әкімі.