Халық жазушысын құрметтеді
<p style="text-align: justify;">Белгілі қаламгер, Халық жазушысы Бексұлтан Нұрже­кеевке «Жетісу облысының Құрметті азаматы» атағы берілді. Құрметті марапатты Талдықорған төрінде өңір басшысы Бейбіт Исабаев тапсырды.</p>
Облыс әкімі жазушының шығармаларын бірнеше буын оқып өскенін, соның ішінде өзі де бала күнінен қаламгерді туындылары арқылы танығанын атап өтті.
«Кеңестік кезеңнің қатаң сүзгісі бар кездің өзінде сіздің шығармаларыңыздың шындықты айта білетін мінезі болды. Бұдан бөлек, тарихи туындыларыңыз бір төбе. Сізді аз жазса да, саз жазатын, мемлекеттік, қоғамдық деңгейдегі ірі мәселелерге кесек пікір айта білетін қайраткер ретінде құрметтейміз», деген Б.Исабаев жазушының шығармашылық еңбегіне табыс тілеп, арнайы атақтың лентасын, төсбелгісі мен құжатын ресми түрде табыстады.
Өз кезегінде Бексұлтан Нұржекеев ризашылық тілегін білдіріп, «Туған жерімнің бұл сыйы – маған бәрінен қымбат. Жетісудың мен үшін орны бөлек. Және осы отырған әрқайсысыларыңыз үшін де солай болуға тиіс. Президент әділетті қоғам құру, адал азамат болу туралы айтты. Сол ұстанымды әрқайсысымыз өзімізден бастауымыз керек. Бүгінгі маған көрсетіп отырған құрметтеріңізге ризашылығымды білдіремін», деді.
Айта кетейік, Бексұлтан Нұржекеев Жетісу облысы Панфилов ауданы Ақжазық ауылында туған. Ол «Күтумен кешкен ғұмыр», «Ерлі-зайыптылар», «Жау жағадан алғанда», «Әй, дүние-ай» сияқты бірқатар прозалық кітаптың авторы.
Жетісу облысы