Әр өтінішке талдау жүргізіледі

Мемлекеттік көрсетілетін қыз­мет­тер сапасын бақылау және мем­ле­кет­тік аппарат қызметін бюрократиядан арылту мәселелері туралы баяндама жасаған Мемлекеттік қызмет істері агенттігі төрағасының орынбасары Салауат Мүксімов: «Агенттік мемлекеттік қызмет алушылардың құқықтарын қор­ғауға бағытталған алдын алу шараларына басымдық береді. Осыған байланысты жүргізілетін тексерулер қызмет берушілердің құқық­қа қайшы әрекеттерінің себептері мен жағдайларын анықтауға бағыт­тал­ған», деді.

Осы мақсатта өткізілген 195 про­фи­­лактикалық іс-шарада 45 мың­нан астам бұзушылық анықталса, оның 58 пайызы әкімдіктерге тиесілі бол­ған. Көрсетіл­ген бұзушылықтар са­ны­ның 51%-ы мемлекеттік қыз­мет көрсету мерзімдерін бұзу (18,8%), артық құжаттарды талап ету (29,5%) және негізсіз бас тартуға (2,8%) байланысты. Сондай-ақ жыл басынан бері агенттік сапасыз мемлекеттік қыз­мет көрсетуге қатысты 629 өтініш­ті қараған. Шағымдардың көп­шілігі мемлекеттік органдардың жер қаты­настары, сәулет, тұрғын үй-ком­муналдық шаруашылығы, жұмыспен қамту және әлеуметтік қам­сыздандыру салаларында мем­ле­кеттік қызметтер көрсету кезін­дегі іс-әре­кеттеріне қатысты болып отыр. Өтініш­терді қарау қоры­тын­дысы бойынша 181 көр­се­ті­ле­тін қызметті алушының құ­қық­тары қал­пына келтірілген.

Спикердің айтуынша, келіп түскен әрбір өтінішке жан-жақты талдау жүргізіледі. Одан бөлек, азамат­тар­дың мүдделері мен сұраныстарын ескере отырып, көрсетілетін қызметті беру­шілердің жұмысы мен тиімділігі баға­ланады. «Қызмет алушылардың құқық­тарын проактивті түрде қорғау және қалпына келтіруге ерекше назар аударылады. Осылайша, қызмет алушылар­дың бұзылған құ­қық­тарын олардың өтініштерін күтпес­тен проактивті түрде қашықтан мо­ниторинг жүргізу жолымен қал­пына келтіру тәжірибесі іске асырылып келеді. Жүргізілген мониторинг нәтижесінде бас тарту себеп­терін толық көрсетпеудің 571 фактісі анықталды. Профилактика мақ­са­тында мемлекеттік органдарға көрсе­ті­летін қызметті берушілер тарапынан болған жүйелі бұзушылықтарға жол бермеу жөнінде ұсынымдарды қарастыратын талдау жолданды», дейді С.Мүксімов. Айталық, жыл басынан 577 қызметкер тәр­тіптік жауапкершілікке, ал 298 мем­лекеттік органдар мен ұйымдардың басшысы әкімшілік жауапкершілікке тартылды. Мемлекет кірісіне 22,1 миллион теңге өндірілген.

Сонымен бірге агенттік жыл сайын қоғамдық мониторинг жүргізеді. Оның аясында мемлекеттік қызметтердің сапасы мен қолжетімділігіне қатыс­ты халық пікірі, мүддесі, ұсыныстары мен қалауы зерттеледі. Одан бөлек, «электрондық үкімет» порталында онлайн сауалдама іске қосылған. Онда кез келген азаматқа ұсынылған мем­лекеттік қызметтің сапасын өз бе­тін­ше бағалауға мүмкіндік қарас­ты­рылған.

Мемлекет басшысының тапсыр­ма­ларын орындау мақсатында агент­тік мемлекеттік аппаратты бюрокра­тия­дан арылту жөнінде шаралар қа­был­дап, бұл бағытта жүргізілген мониторинг пен талдау нәтижесінде 373 ұсыныс әзірленген. Бұл ұсыныстар бизнес-үдерістерді реинжинирингтеу, артық құқықтық рет­теуді, жоғары талаптарды алып тастауға, функцияларды орталықсыздандыруға және лауа­зымды тұлғалардың дербес жауапкершілігін күшейтуге бағытталған.