Электронды жетекші
<p style="text-align: justify;">Абай облысы Аягөз ауданының мұғалімдері көру қабілеті нашар адамдардың өмір сүру сапасын жақсартуға пайдалы өнім ойлап тапты. «Электронды жетекші» деп аталатын құрылғы күнделікті өмірде қауіпсіз қозғалысты қамтамасыз етіп, әртүрлі жарақаттардың алдын алады.</p>
«Электронды жетекші» – көзі нашар көретін жандардың жүріп-тұруына көмектесетін инновациялық құрылғы. Таяқтағы датчик пайдаланушының жолындағы кедергілерді алдын ала анықтап отырады әрі дыбыстық нұсқаулар береді. Сондай-ақ пайдаланушыға қажетті орынды табуға көмектесетін мобильді қолданбалар да бар. Айналадағы әртүрлі нысандарды және басқа да маңызды бөлшектерді анықтауға көмектесетін компьютерлік көру технологиясы да қарастырылған. Бұған қоса қосымша мүмкіндіктерді пайдалану үшін құрылғыны смартфонға қосуға мүмкіндік бар.
Жобаны информатика пәні мұғалімдері Алтынай Ыбыраева мен Арайлым Ысқақова, орыс тілі пәні мұғалімі Айжан Қуандықова, математика пәні мұғалімі Данияр Надырбаев жасап шыққан.
«Ең бірінші Arduino мен ультродыбыстық датчик арасында байланыс болу үшін оны сымдармен жалғадық. Бұл кедергілерді көреді. Келесі зуммер датчигін қосып, дыбысын қамтамасыз еттік. Қуат беру үшін батарея қажет болды. Arduino бағдарламасын пайдаланып, C++ тілінде бағдарлама жаздық. Компьютер мен жасаған машинаны USB шнурмен жалғап, жазған бағдарламаны электронды жетекшіге жүктедік», дейді жоба авторлары.
Мұғалімдер «Электронды жетекші» құрылғысына жұмсалатын шығын мен кірісті де ойластырған. Олардың айтуынша, бір таяқшаны жасап шығаруға 7 860 теңге қажет, ал оны нарықта 17 мың теңгеге сатуға болады. Елімізде мұндай құрылғы жоқ, сондықтан бағасы да қолжетімді.
Алдағы уақытта жоба авторлары мүгедектер қоғамымен келісіп, мемлекеттік сатып алуға қатысуды жоспарлап отыр. Айта кетейік, мұғалімдер жобасы қараша айында IT чемпионатқа қатысты.