Өскемендік жекпе-жек шеберлері
<p style="text-align: justify;">Шығыс Қазақстан облы­сының тұрғындары Бек­болат Сағиевтың отбасын «спортшылар жанұясы» деп атайды. Бекболат кү­рестен спорт шебері, ке­зінде республикалық, об­лыстық, халықаралық сайыстарда сан мәрте жеңіс тұ­ғырынан көрінген. Ал оның ұлы Жас­ұлан да – спорт­ты өзіне серік еткен, қоян-қолтық жекпе-жек шеберлерін баптап, түр­лі жарыста жүлде теріп жүр­ген саңлақ.</p>
Жақында Бекболаттың ұлы Жасұлан хабарласты:
– Аға, өткен жылдың аяғы мен осы жылдың басы біз үшін жемісті болды, – деді ол.
Былтыр 25 қарашада Қарағанды қаласында Номад ММА-дан Әлем кубогі өтті. Дүбірлі жарыста екі түлегіміз – Қырмызы Тоқтамыс пен Айару Құрманбек алтыннан алқа тақты. Одан бір апта бұрын Қостанай қаласында жалауы желбіреген ММА Бирман боксынан ел чемпионатында Қырмызы Тоқтамыс, Аяжан Қабылхан, Ислам Қуанышұлы чемпион атанса, Мәди Алтынбек, Әмірәлі Бекболат, Алан Оразбеков, Айару Құрманбек күміспен күптелді. Арада бір айдан соң Бахрейнде өткен Азия чемпионатында Қырмызы Тоқтамыс екінші орынға табан тіреді. Қаржының тапшылығынан жүлде алады деген бірнеше спортшымыз жарысқа бара алмады. Жақында ғана Өскеменде өткен понкратионнан өңір біріншілігінде 11 шәкіртіміз алтыннан алқа тақса, бес түлегіміз екінші орынға ие болды. Енді олар республикалық жарысқа дайындалып жатыр.
Бірер айда осыншама жарысқа қатысып, жүлде терген Өскеменнің жекпе-жек шеберлері жеңіске жаттығулар мен ізденістің арқасында жеткендері белгілі. Қырмызы Тоқтамыс – әлемнің үш дүркін чемпионы, Азия жеңімпазы. Ал Бекболаттың немересі Әмірәлі осы спортта тамаша жетістіктерге жетті. Облыстың бірнеше дүркін чемпионы, Ресейдің Екатеринбург қаласында жалауы желбіреген аралас жекпе-жек жарысынан екінші орынмен оралды.
Әкелі-балалы Бекболат пен Жандос Сағиевтардың шәкірттері әлі талай биік белесті бағындыратындары сөзсіз. Қаржы тапшылығына қарамастан алыс елдерге сапар шегіп, өздерінің шеберлігін күн сайын шыңдап жүрген өскемендік өрендерге сәттілік серік болсын дегіміз келеді.
Оңдасын ЕЛУБАЙ,
журналист
ӨСКЕМЕН