Қысқы санақ жүргізіліп жатыр
<p style="text-align: justify;">Катонқарағай мемлекеттік ұлттық табиғи паркінде аң-құстарды қысқы есепке алу жұмыстары жүргізіліп жатыр. Тау-тасты кезіп, санақ жұмысын жүргізу үшін 248 мемлекеттік инспектор, сондай-ақ жануарлар әлемін қорғау және өндіру бөлімінің 5 маманы жұмылдырылды.</p>
Аң санау жұмыстары жылдың қай мезгілі болмасын, оңай емес. Қамаудағы мал сияқты бас-басымен санап алмайды. Алтайдың жыңғыл-жыңғылын, сай-саласын атпен, болмаса жаяу аралап, ізімен санайды. Елік-марал үйірімен кездессе, суретке түсіріп, тіркеп алады. Фототұзақтың көмегіне де жүгінеді. Бірақ ол құрылғы аң біткенді түсіріп үлгермесі анық.
– Ұлттық парк аумағындағы аң-құстарды жыл сайын тізімдеп, санын шығарып отырамыз. Сонымен қатар тұяқты жануарларды азықтандыру жұмыстарын да жүргізіп жатырмыз. Себебі қар жылдағыдан қалың, – дейді жануарлар әлемін қорғау және өндіру бөлімінің басшысы Ерік Қасымов.
Алтайда қыс ұзақ әрі қатал. Қатал қыста түз тағысы жүрген соқпақпен соңдарына түсе із санап жүрген инспекторлардың еңбегі еңбек-ақ. Қысқы санақ есептеріне қарасақ, Катонқарағай мемлекеттік ұлттық табиғи паркінің аумағында 120 бұлан, 400 бастай марал, 2 200 мөлшерінде елік бар екен.
Естеріңізге сала кетейік, ұлттық парк аумағында аңның қай түрі болмасын, аулауға қатаң тыйым салынған. Сондықтан да шығар, қасқыр көбейген. Ауыл маңын торуылдап жүретін ит-құс малшылардың мазасын қашырғаны да және рас. Малмен жан баққан ауыл тұрғындарының айтуынша, одан құтылудың жалғыз жолы бар: заң аясында аңшыларға қасқыр атуға рұқсат беру қажет.
Шығыс Қазақстан облысы,
Катонқарағай ауданы