18 жастағы алаяқ
<p style="text-align: justify;">Елімізге шетелден әкелінетін авто­кө­лік­терді алғашқы есепке қою мен ути­ли­за­ция­лық төлемнің шектен тыс жо­ға­ры болуы ел тұр­ғындарын заңды ай­на­лып өтетін түрлі амалдарға баруға итер­мелеп жатыр. Осы жолда кейбірі арзан ақ­ша­ға жасап беремін деген алаяқтардың құ­ры­ғы­на түседі. Ақтө­бе­де болған оқиға – со­ның бір дәлелі.</p>
Полиция бөліміне жергілікті тұрғын белгісіз ер адам алаяқтық жолмен одан 300 мың теңге алып, жақын шетелден әкелінген автокөлікті есепке қоюға көмектесуге уәде бергенін, алайда уәдесін орындамағанын айтып арызданған. Жедел-іздестіру іс-шараларының нәтижесінде тәртіп сақшылары күдіктіні анықтап ұстады. Ол Маңғыстау облысының 18 жастағы тұрғыны болып шықты. Күдікті өз кінәсін мойындады.
Қазіргі уақытта ұсталған адамның тағы екі эпизодқа қатысы бары анықталып отыр. Алаяқтық факт бойынша сотқа дейінгі тергеу басталды. Күдікті уақытша ұстау изоляторында отыр.
Ақтөбе облысының полиция департаменті халықты шетелден әкелінген автокөлікті аз ақшаға есепке қойып беремін деген қызмет түрлерінен бас тартуға шақырады. Дегенмен алғашқы есепке қою мен утилизациялық төлем шектен тыс көп болып тұрғанда мұндай қылмыстардың тыйылуы екіталай екені рас. Өйткені әлемнің басқа ешбір елінде кездеспейтін осындай «төлемдер» салдарынан шетелден сатып алынған көліктің бағасы екі еселеніп кетеді. Ал мұны халықтың көп бөлігінің қалтасы көтере бермейді. Сондықтан олар заңды белшесінен басатын әлгіндей қитұрқы жолдарға баратыны белгілі.