Наурыз 10 күн тойланады

Осыған орай кеше Пре­зидент жанындағы орталық ком­муникациялар қызметінде Наурыз мейрамын атап өтуге қатысты брифинг өтті. Іс-ша­рада сөз алған Мәдениет коми­теті төр­ағасының орынбасары Сәбит Барлыбаев ақжолтай хабарды жеткізді.

– Биылдан бастап Мемлекет басшысының ұсынысымен еліміздің барлық өңірінде Наурыз мерекесін жаңа форматта өткізу жоспарланып отыр. Мерекені 14-24 нау­рыз аралығында өткізу ұсы­ныл­ды. Наурыздың бірегей ло­готипі бекітіліп, еліміздің барлық аймағына таралды. Та­рихи тұрғыдан алғанда он күнге жалғасатын бұл іс-шара Нау­рыз­нама деп аталады. Әрине, ұлық мейрам туралы деректер біздің ұлы философтарымыз Махмұд Қашқари, Мәшһүр-Жү­сіп Көпейұлы, Мұхтар Әуе­зовтің еңбектерінде көрсетіліп жазылған. Ал енді Наурызнамаға келетін болсақ, 14 наурыз – Көрісу күні, амал мерекесі деп те аталады. Бұл еліміздің батыс өңірлерінде сақталған. Бүгінгі күні аталған мерекені барлық аймақтарда тойлау ұсынылды. 15 наурыз – Қайы­рымдылық күні деп белгіленді. Қоғамға қайы­рым­дылық мәдениетін сіңіріп, жа­на­шыр­лық пен өзара қол­ұшын беру құндылықтарын қалыптастыруымыз қажет. 16 наурыз – Мәдениет және ұлттық салт-дәстүр күні аталып өтеді. Мәдениетіміз бен өнерімізді насихаттауға арналып, респуб­лика бойынша түрлі іс-шара ұйымдастырылады. 17 наурыз – Шаңырақ күні деп белгіленді. Отбасылық құндылықтарды дәріптеуге, бұл кезде өнегелі ұрпақ тәрбиелеген үлгілі отба­сыларға арналған іс-шаралар өтеді. Ақсақалдарымыз жас отбасыларға бата береді. 18 нау­рыз – Ұлттық киім күні. Елі­міздің барлық өңі­рінде ұлтық киімімізді наси­хаттауға ба­ғыт­талған түрлі іс-шара жос­парланған. 19 нау­рыз – Жа­ңару күні көктемгі ағаш егу дәстүрімен жалғасады. 20 наурыз – Ұлттық спорт күні еліміздің барлық аймақтарында түрлі жарыс­тар ұйымдастырылады. 21 нау­рыз – Ынтымақ күні жалпы халық бір-біріне деген сый-құрметтерін арттырып, татулық пен бірлікті насихаттауға арналады. 22 наурыз – Жыл басы. Бұл күні еліміздің барлық өңірлерінде жалпыхалықтық мәдени-спорттық іс-шаралар өткізіліп, стильді этноауылдар мен түрлі жәрмеңке ұйым­­­­дастыры­ла­ды, киіз үй­лер тігіліп, түрлі жәрмеңке ұйым­дастырылып, мәдени шаралар өткізіледі, – деді Сәбит Барлыбаев. Сонымен қатар ол 14-23 наурыз аралы­ғында «Наурыз базарлық» мау­сымы жарияланатынын баян етті. Әртүрлі сауда орнында жаппай сатылымдар, же­ңіл­діктер қарастырылып, ха­лыққа ыңғайлы сауда ісі ұсы­ныл­мақ. Ал Наурызнаманың қо­рытындысы – 24 наурыз күні Тазару күні деп жарияла­нып, еліміздің барлық аймағында жалпыұлттық экологиялық акция өткізілмек.

Сонымен қатар Астана қала­сы Мәдениет басқармасы бас­шы­сының орынбасары Нұран Қамзин елордада өтетін іс-ша­ралар туралы айтып өтті.

– Қала әкімдігі елордада­ Наурыз мейрамының қар­­саңында тұрғындар мен қонақ­тар үшін 200-ге жуық іс-шара өткізуді жоспарлап отыр. EXPO халықаралық көрме орталығында көшпелі өнер фестивалі өтеді, қазіргі уақытта дайындық жұ­мыстары жүргізіліп отыр, 21-22 наурызда сағат 11.00-ден 16.00-ге дейін Қаламгер монументі және басқа орындарда эстрада жұлдыздарының қатысуымен негізгі мерекелік концерттер ұйым­дастырылады. Сонымен қатар қаланың бес ауданында 30-дан астам мерекелік концерт өтеді, – деді ол.

Осылайша, еліміздің рухани қуатын, ұлттық танымын кеңейтетін бірегей мерекеміз жаңаша аталып өтпек. Бұл – хал­қымыздың рухани им­му­нитетіне, сан ғасырлық берік ұлт­тық кодына оң әсер етері сөзсіз.