Өңделген өнімнің үлесін арттыру қажет
<p style="text-align: justify;">Сенаттың Аграрлық мәселелер, табиғатты пайдалану және ауылдық аумақтарды дамыту жөніндегі комитетінің кеңейтілген отырысы өтті. Жиында «Агроөнеркәсіптік кешеннің экспорттық әлеуетін арттыру, импортты алмастыру жағдайында ауыл шаруашылығы өнімдерін қайта өңдеу мәселелері» атты Үкімет сағатының қорытындысында қабылданған ұсынымдардың іске асырылуы туралы» тақырыбы талқыланды.</p>
Комитет төрағасы Әли Бектаев Қазақстан үшін агроөнеркәсіп кешені еліміз экономикасының негізгі саласы екенін атап өтті. Жаңа технологияны пайдалану арқылы қайта өңделген өнімнің үлесін ұлғайта отырып, оны 70 пайызға жеткізу туралы Мемлекет басшысы тапсырмасының орындалуын қамтамасыз ету керек.
«Қазақстан үшін агроөнеркәсіп секторы мен қайта өңдеу өнеркәсібі азық-түлік қауіпсіздігін қамтамасыз ету және ауыл шаруашылығы өнімдеріне ішкі сұранысты қанағаттандыруда маңызды рөл атқарады. Үкіметтің, бизнес-қоғамдастықтың және ауыл тұрғындарының бірлескен күш-жігерімен ғана агроөнеркәсіп сектордың тұрақты дамуын қамтамасыз етуге және елдің импорттық өнімдерге тәуелділігін төмендетуге болады», деді Әли Бектаев.
Сенатор Закиржан Кузиев өз кезегінде Үкімет сағатының қорытындысында комитет өз құзыреті аясында мемлекеттік органдарға 27 ұсыныс бергенін еске салды. Ондағы 13 ұсыным бойынша мемлекеттік органдар қажетті шаралар қабылдады, 6 ұсыным орындалмады және 3 ұсыным бойынша талқылау және жоспарлау сатысында жұмыс жүріп жатыр.
Ауыл шаруашылығы министрінің орынбасары Бағлан Бекбауов өз сөзінде осы ұсыныстарды іске асыру үшін агроөнеркәсіп кешенін дамытудың 2021-2030 жылдарға арналған тұжырымдамасына тиісті өзгерістер енгізілгенін айтты. Олар қайта өңдеу кәсіпорындарын өндіріс қуатында барынша қамтамасыз ету, ауыл шаруашылығы шикізатын қайта өңдеу үлесін ұлғайту және ішкі және сыртқы нарықтарда отандық өнімнің бәсекеге қабілеттілігін арттыру үшін мемлекеттік қолдаудың жүйелі шараларын жүзеге асыруға бағытталған.