Қой жүнінен тыңайтқыш
<p style="text-align: justify;">Осы күні жоба дайындап, әр салада жаңалық ашып жүрген мектеп оқушылары аз емес. Мысалы, Қазалы ауданындағы №165 орта мектепте «Жасыл мектеп» бастамасы аясында түрлі идея туындап, оқушылар сол арқылы экоөнімдер шығаруға ден қойған.</p>
Мұндағы жылыжайда қияр, қызанақ, басқа да көкөністер өсіріліп жатыр. Осы мектептің 10-сынып оқушысы Бекзат Жаңабайұлы болашақтағы «Жасыл мектеп» жобасын әзірлеген. Алда ол экоқалдықтарды өңдеу шеберханасын жабдықтап, өсімдіктерге бірнеше тәжірибе жасап көрмекші.
«Жасыл мектеп» – оқушыларды экомәдениетке тәрбиелеп, мектебіміздің ауласын таза ұстап, көгалдандыруды көздейді. Сонымен қатар күн және жел энергиясын телефон арқылы басқарып, тоқ көзін үнемдеуге арналған жобам да бар», дейді ол.
Аудандағы үздік жобалардың бірі – №95 мектептің 11-сынып оқушысы Ақарыс Қалымбеттің қой жүнінен табиғи тыңайтқыш жасау бастамасы. Осыдан 2 жыл бұрын басталған ізденіс үстінде бізде кәдеге жарамайтын қой жүнінің Ирландия елінде экспортқа шығарылатын бағалы тыңайтқышқа айналғанын анықтады. Облыс тұрғындары арасында қой жүні арқылы сәбіз бен картоп егіп, мол өнім алып отырғандар бар екенін білді. Жетекшісімен бірлесіп, қолдағы бар бөлшектерден қой жүнін түйіршіктейтін құрылғы жасап шығарды.
«Қой жүнінде өсімдіктерге керекті барлық дәрумен бар. Оны кәдімгі табиғи гидропоника деуге болады. Ол кез келген тыңайтқыш орнына жүреді. Құрамындағы өсімдікке қажетті қоректік заттар ұзақ уақытқа дейін шірімейді», дейді ізденімпаз оқушы.
Қызылорда облысы,
Қазалы ауданы