1941 жылғы әдебиет хрестоматиясы
<p style="text-align: justify;">Бұқар жырау музейіне қарапайым ауыл тұрғыны 1941 жылы жарық көрген «Qazaq әdebietj» (Қазақ әдебиеті) хрестоматиясын тапсырды. Латын қарпіндегі бұл оқу құралы орта мектептің 9-сыныбына арнап шығарылған екен.</p>
Көне оқулық Алматы қаласындағы қазақтың біріккен мемлекеттік баспасынан шыққан. Құрастырушысы – әдебиет зерттеушісі, кейін филология ғылымының докторы, Ұлттық ғылым академиясының корреспондент мүшесі, Қазақ КСР еңбек сіңірген ғылым қайраткері болған Есмағамбет Ысмайылов.
Бұл кітап-оқулықтың ерекшелігі – мұнда кеңес заманының алғашқы жылдары шығармашылығына тыйым салынып, есімдерін ел айтуға қорыққан тұлғаларымыздың әдеби дүниелері жарық көрген.
Хрестоматияда Ыбырай Алтынсарин, Абай Құнанбайұлы, Шәңгерей Бөкеев, Ақан сері Қорамсаұлы, Нармамбет Ормамбетұлы, Нұржан Наушабаев, Мәшһүр Жүсіп Көпеев, Ғұмар Қараш, Спандияр Көбеев, Сұлтанмахмұт Торайғыров, Сәбит Дөнентаев, Ығылман Шөреков, тағы басқа әдебиет өкілдерінің, жалпы саны 20 ақын-жазушының шығармалары басылған.
Жәдігер-кітапты музейге Ақтоғай ауданы Мүткенов ауылының тұрғыны, зейнеткер Нұраш Бейсембаева тапсырды. Нұраш Мұқажанқызының айтуынша, хрестоматияны ауылдық мектепте ұзақ жылдар ұстаздық еткен Жүсіп Төлеутеміров атты ел ағасы сақтап келіпті. Кейін мектеп күрделі жөндеуден өткен уақытта ескі оқулықтар арасынан табылған.
Павлодар облысы