Ең жоғары балл – 136
<p style="text-align: justify;">Негізгі ҰБТ басталғаннан бері Батыс Қазақстан облысында 4 065 мәрте тест тапсырылған. «Талапкерлердің 70 пайызы қазақ тілінде, 30 пайызы орыс тілінде тестілеуден өтті» дейді облыстық білім басқармасының баспасөз хатшысы Назгүл Мұхамбетжанқызы.</p>
ҰБТ басталғалы 79 пайызға жуық талапкер шекті балды жинаған. Ал жалпы батысқазақстандықтардың орташа көрсеткіші – 72 балды құрапты. Бұдан бұрын хабарлағанымыздай, ең жоғары балл – 136. Оның иесі – Орал қаласындағы «Abyroi school» жеке мектебін бітіруші Құралай Есенғожина екенін бұдан бұрын хабарлаған болатынбыз.
Айта кетейік, өңірдегі тестілеу орталықтарында талапкерлер үшін барлық жағдай жасалған. Соның ішінде ерекше қажеттілігі бар үміткерлер үшін қолайлы жағдай жасаудың арқасында ҰБТ-ға төрт аптаның ішінде 20 ерекше талапкер қатысыпты. ҰБТ басталғалы бері өңірде 5 адамның тарапынан ереже бұзушылық анықталған. Бір талапкер смартфон, шпаргалка және басқа да тыйым салынған затты алып өту әрекеті салдарынан тест тапсыру мүмкіндігінен айырылды. Ал тестілеу кезінде ереже бұзғаны үшін аудиториядан 4 адам шығарылып, олардың нәтижелері жойылған.
Жалпы, Батыс Қазақстан облысы бойынша 6 381 адам биылғы ҰБТ сынағына қатысу үшін тіркелген болатын. Олардың 75,3%-ы қазақ тілінде, 24,7%-ы орыс тілінде, 1 адам ағылшын тілінде тестілеуден өтуге өтініш білдірген.
Батыс Қазақстан облысы