Тәлімі мол экспедиция
<p style="text-align: justify;">Назарбаев Зияткерлік мек­тептерінің ұйымдасты­руы­мен 2012 жылдан бері тұ­рақты жүзеге асып келе жат­қан дәстүрлі «Туған елге тағ­зым» экспедициясы биыл Ақтау, Семей, Қарағанды, Түр­кіс­тан, Көкшетау, Өскемен және Павлодар қалаларында жалғасты. Экспедициямен Маң­ғыстау өңіріне келген Павлодар, Қызыл­орда және Орал қала­сындағы Зияткерлік мектеп оқушылары Маңғыстаудың әсем таби­ғатын тамашалап, тағылымды тарихына қанықты. Ақтаудағы Назарбаев Зияткерлік мектебінде өткен зерттеу ба­ғытындағы аталған өлкетанулық экспедициясына 74 оқу­шы қатысты.</p>
Ақтаудағы Назарбаев Зияткерлік мектебі баспасөз қызметінің хабарлауынша, жоба аясында экспедициялық топ Маңғыстау өлкесіне тән флора мен фауна ерекшелігімен, тарихы және тұрмыс-мәдениетімен, инновациялық нысандары және архитектуралық құрылыстарымен жіті танысты.
Оқушылар алдымен Қабиболла Сыдиықов атындағы Маңғыстау облыстық кітапхананы аралап, кітапхана құрылысымен, өлкетану бөліміндегі кітаптар жайында ақпарат алды, заңғар жазушы Әбіш Кекілбайұлы атындағы Маңғыстау облыстық тарихи-өлкетану мұражайын тамашалады. Бір аптаға созылған экспедиция аясында оқушылар Маңғыстау облысының өндірістік әлеуетімен ете танысу, ақпарат алу үшін Ақтаудағы өнеркәсіп орындарына – «KazFruit» азық-түлік сақтау базасына, «Ақтау түйеқұс» фабрикасы, «Kazakh Osseter» компаниясына саяхаттады. Сонымен қатар жас зерттеушілер Қазақстандағы кешенді өнеркәсіп орындарының бірі, аммиак және аммиак селитрасын өндіретін жалғыз кәсіпорын «ҚазАзоттың» және жол битумын өндіруге бағытталған «Caspi bitum» мұнай өңдеу зауытының жұмысымен танысты. Сондай-ақ өңірдегі іргелі оқу ордасы Шахмардан Есенов атындағы КМТИУ Әскери-теңіз академиясымен танысып, соңғы технологиямен жабдықталған оқу орнына қызығушылық танытты. Оқушылар Маңғыстаудағы ХІІ-ХVІІ ғасырларға жататын діни сәулет ескерткіші саналатын Қараман ата жер асты мешітіне барып, діни зиярат орнында ата-баба рухына тағзым етті. Құпиясы әлі ашылмаған орындардың бірі «Торыш» шатқалына барып, тарихы миллион жылдан асатын шатқалды, табиғаттың ерекше үлгісі – «Ақеспе» алқабын тамашалады.
Қазақ даласының көрікті келбетін өз көздерімен көріп, ел мен жер тану, отансүйгіштік сезімін шыңдау жолында оқушылар үшін арнайы экспедиция ұйымдастырған Зияткерлік мектептер жобасының жас буын үшін берері мол болмақ.
Маңғыстау облысы