Мектеп құрылысы пысықталды
<p style="text-align: justify;">Мәжіліс депутаты, «Amanat» партиясы фрак­циясының мүшесі Мұқаш Ескендіров Жамбыл облысына жұмыс сапары аясында Тараз қаласындағы бірқатар нысанды аралап жүр. Кеше депутат №15 мектепке жапсарлас салынып жатқан ғима­раттың құрылыс барысымен танысты.</p>
Мәжіліс депутаты халықпен кездесу барысында партияның «Халықпен бірге!» сайлауалды бағдарламасын жергілікті жерлерде іске асыру сапасын талдауға ерекше көңіл бөліп келеді.
– Жалпы, 781 бала білім алатын ғимарат біраз уақыттан бері оқушыларға тарлық етті. Партия депутаттары осыны ескере келе, былтыр құзырлы органдарға мектепке жапсарлас ғимарат салу туралы ұсыныс айттық. Мәселені шешу мақсатында биыл облыстық бюджеттен 2,5 млрд теңге бөлініп, 300 орынға арналған ғимарат салына бастады, – деді депутат.
Жоспарға сәйкес құрылыс жұмысы келер жылдың ақпан айында аяқталуға тиіс. Бұл жаңалық жергілікті тұрғындарды қуантты. Себебі кей ата-аналар балаларын шалғай орналасқан мектепке апаруға мәжбүр.
Партияның сайлауалды бағдарламасы аясында өңірде былтыр 2 550 оқушыға арналған 5 жаңа мектеп салынып, 3-уі күрделі жөндеуден өтті. Меркі ауданы Меркі ауылында 300 орындық балалар музыка мектебі пайдалануға берілді. Биыл 5 мыңнан астам орынға арналған 9 мектеп салу көзделіп отыр.