Билікөл маңынан табылған сауыт
<p style="text-align: justify;">Облыстық тарихи-өлкетану музейінің қорында әр ғасыр тарихынан сыр шертетін құндылықтар аз емес. Олардың бірқатары археологиялық қазба жұмыстары кезінде табылса, біраз жәдігерді өңір тұрғындары арнайы музей қорына табыстаған.</p>
Музей қорында сақтаулы тұрған сауыт, жауынгер қалқаны секілді жаугершілік дәуірден жеткен жәдігерлер көзге оттай басылады. Алпыс жылдан астам уақыт бұрын қолға түскен құндылықты ғалымдар ХVІІІ-ХІХ ғасырлардан жеткен жәдігер деп отыр.
«Біз көріп тұрған сауыт темір сақиналардан құрастырылғанын байқау қиын емес. Жауынгер киімін садақтың жебесі, найзаның ұшы, қылыштың жүзі өтпейтіндей етіп жасағаны бірден байқалып тұр. Сауыттың әр жерін тот басқан, жеңдері жыртылған. Жаугершілік дәуірдің жәдігері екені еш талас тудырмайды. Тарихы жүз жылдықтармен жалғасып жатқан сауыт әжептәуір көнерген.
Біздің білуімізше, бұл сауытты Билікөл ауылының тұрғыны көл маңынан 1959 жылы кездейсоқ тауып алыпты. Жергілікті азамат олжасын облыстық тарихи-өлкетану музейінің қорына табыстауды жөн деп тапқан. Музейге келген азаматтар сауыттың арғы-бергі тарихы туралы толыққанды мәлімет сұрап жатады. Мамандар оларға білгенінше ақпарат беріп жүр», дейді облыстық тарихи-өлкетану музейі зерттеу жұмыстарын қамтамасыз ету бөлімінің меңгерушісі Лаура Байтұрсынова.
Бұдан бөлек музей қорында сақталған жауынгер қалқаны секілді өзге де құнды жәдігерлер толып тұр. Олардың да өзіне тән тарихы бар.
Тараз