Қарақұрт неге қаптады?

Ресейдің Астрахан өңірімен шекарадағы Атырау облысы­ның Құрманғазы ауданының тұр­ғы­ны қарақұрт шаққанын білмей қалған. Оны аман алып қалу үшін Балқұдық ауылындағы дә­рі­герлер Астрахан облы­сының дәрігерлерін шақыртуға мәжбүр болды.

«Балқұдық ауылындағы ауру­хана дәрігерлері Харабалы аудандық ауруханасына хабарласты. Ондағы емдеу мекемесі­не 1970 жылы туған жергілікті тұрғын жәндіктің шағуынан кейін токсикалық уланумен түс­кен. Жергілікті тұрғынды қара­құрт шаққаны жөнінде бол­жам жасалған. Ер адамға шұ­ғыл мамандандырылған меди­ци­налық көмек қажет болды. Мұндай көмек көрсете алатын Балқұдық ауылына ең жақын орналасқан медициналық мекеме – Харабалы аудандық ауру­ханасы. Балқұдық ауылына реа­нимация бригадасы аттанды. Зардап шеккен тұрғын аудандық аурухананың жансақтау бөлімі­не жедел жеткізілді», деп хабарлады Астрахан облысының ден­саулық сақтау министрлігі.

Харабалы аудандық ауруха­насының дәрігерлері науқасқа қажетті емнің бәрін жүргізді. Екі күннен кейін атыраулық науқас жансақтау бөлімінен па­латаға ауыстырылған. Қазір оның өміріне төніп тұрған қауіп жоқ.

Атырау облыстық денсау­лық сақтау басқармасының баспа­сөз қызметінен мәлім еткендей, облыстық ауруханаға түскен 13 адамды қарақұрт шаққаны анықталған. Науқастардың төр­теуі аурухананың жансақтау бөліміне жатқызылып, толықтай ем-дом шарасын алып шыққан. Ал 9 адамға қарақұртқа қарсы екпе салынып, амбулатор­лық ем алуға жіберілді. Облыс­тық ­балалар ауруханасына 3 бала түсті. Оның ішінде 2 бала жан­сақ­тау бөліміне жат­қы­зылып, дәрігерлердің бақы­лауына алынып отыр. Бір балаға қарақұртқа қарсы екпе салынған.

«Аудан орталықтарында қа­ра­құрт шаққан үш жағдай анық­талды. Оның біреуі – Индер, екіншісі – Исатай, ал үшін­ші дерек Қызылқоға ауданын­да тіркелді. Дәрігерлерге жү­гінген пациенттерге алғашқы амбулаторлық көмек көрсе­тіл­ді», деп мәлімдеді басқарманың баспасөз қызметінен.

Облыстық ауыл шаруа­шы­лығы және жер қатынастары басқармасының ресми өкілі Ақ­тілек Нұроллаеваның ай­туынша, биыл қарақұрт көбе­йіп отыр. Әсіресе тұрғындар­дың иелігіндегі Ойсылқара тұқы­мына «жаудай» тиді.

«Облыс аумағында маусым-шілде айларында 485 түйені қарақұрт шақты. Соның салдарынан 90 түйе шығын болды. Симптоматикалық емдеу ша­раларының нәтижесінде 306 жануар сауықты. Ал 89 түйеге әлі де емдеу жүргізіліп жатыр. Қарақұрт шаққаннан өл­ген­ малдың иелеріне 65 млн 211 мың теңге төленді», деді А.Нұроллаева. Оның мәліметі­не сүйенсек, улы жәндіктердің ­ша­ғуының алдын алу, емдеу және өлген жануарларға өтемақы тө­леу бюджет қаржысы есебінен қарастырылмаған. Алайда соған қарамастан жергілікті ветеринарлар улы жәндік шаққан малды емдеу шараларын күнделікті жүргізіп жатыр.

«Улы жәндіктерді жоюды бюджет қаржысы есебінен ат­қарылатын іс-шаралар тізбесіне қосу жөнінде шаралар қабыл­дау үшін Ауыл шаруашылы­ғы ми­нистрлігіне хат жолданды. Мал иелеріне улы жәндіктер көп тараған жайылымда түйе, жылқы және сиырды жаюдан бас тартуды, ауру белгілері білін­ген жануарлар туралы жедел түр­де ветеринарларға хабарлау, сондай-ақ емдеу шаралары жүргізіліп жатқан жануарларды күтіп-бағу ережелерін қатаң сақтау ескертілді», деді А.Нұроллаева.

Атырау облысы