Алматы облысында полиция үш тоннаға жуық қарасора тапты
<p style="text-align: justify;">Алматы облысының полицейлері Балқаш өңірін әуе барлау кезінде үш тоннаға жуық голланд қарасорасын тапты, деп жазады <a href="/" target="_blank" rel="noopener noreferrer">Egemen.kz</a>.</p>
Күдіктілердің қарасораны арнайы өсіргені суару жүйесі арқылы нақтыланған.
Сонымен қатар арал аумағында орналасқан шатырда патрондарымен тегіс ұңғылы қару, қажетті екі қап тыңайтқыш, сондай-ақ қарасораны суару және өңдеу туралы жазбалары бар дәптер табылған.
«Есірткі плантациясы Балқаш көлі аралдарының бірінде анықталды. Жүргізілген сараптама тәркіленген 6 122 өсімдік бұтасы жалпы салмағы 2 тонна 740 келі голландиялық каннабис екенін растады. Құрамында есірткі заттары бар өсіруге тыйым салынған өсімдіктерді заңсыз өсіру фактісі бойынша қылмыстық іс қозғалды. Күдіктілерді ұстауға бағытталған жедел-іздестіру іс-шараларының кешені өткізіліп жатыр», деді Алматы облысы полиция департаментінің бастығы Бауыржан Әленов.
Осылайша полицейлер құны 300 млн теңгені құрайтын қарасораның қара нарыққа түсуінің алдын алды.