Қаржы нарығындағы өзгеріс
<p style="text-align: justify;">Нарық өрлеуі үшін елдегі қаржы саласы қағажу көрмеу керек. Бұл – күрделі де көпөлшемді ұғым. Қай экономистен сұрасаңыз да, «қаржы дағдарысы аяқасты келмейді, алдын ала міндетті түрде сездіреді» дейді. Сол себепті табан асты түйткіл тумас үшін мамандар бұл мәселені үнемі назарда ұстап отырады. Мұның бір мысалы – жақында өткен «Astana Finance Days» конференциясы. Онда Еуразия өңіріндегі қаржы саласының қазіргі заманғы мәселелері, үрдістері мен мүмкіндіктері талқыға түсті.</p>
Ауқымы кең кеңеске жыл сайын 3 000-нан астам адам қатысады. Олардың қатарында мемлекеттік орган өкілдері, қаржы саласының жетекші сарапшылары, инвесторлар мен бизнес-көшбасшылар бар. Биыл мамандар қаржы секторындағы озық технологиялар, еліміздің инвестициялық мүмкіндіктері, қаржының орнықты дамуға, қоғамдағы оң өзгерістерге әсерін талқылауға жиналды.
Екі күнге созылған жауапты жиында сарапшылар әртүрлі тақырыпты қаузады. Әсіресе елдегі қаржы институттарының инвестициялық әлеуеті мен рөлі, деректерді қорғау, бизнесте жасанды интеллектіні пайдалану, ерікті көміртегі нарығын құру, капитал нарығы, қаржы саласындағы технологиялар, корпоративтік және бөлшек сектор үшін исламдық қаржылық шешімдер басты назарда болды. Талқыланған тақырыптар арасында жасанды интеллект жайы да бар.
«ЖИ дәуіріндегі құпиялылық: бизнес үшін өзгеріс үстіндегі сын-тегеуріндер және табыстың бейімді стратегиялары» тақырыбында мамандар зерттеулері мен нұсқаулықтарын көрсетті. Жасанды интеллект технологиялары қарқынды дамып жатқандықтан, оны қаржылық қызметтер саласына интеграциялау маңызды. «Астана» халықаралық қаржы орталығы (АХҚО) инновацияларды ынталандырып қана қоймай, дербес деректерді, жеке тұлғалардың құқығын қорғауды қамтамасыз ететін сенімді нормативтік-құқықтық база құру қажеттілігін түсініп, жоспар құрып отыр. Осы тұрғыда отандық бизнесте жасанды интеллектінің үлесі қаншалықты деген сұрақ кім-кімді де қызықтыруы мүмкін.
– Бизнестің жасанды интеллектіден көретін пайдасы – сатып алған бағдарламалық жасақтамасының бұрынғыдан да тиімдірек бола түсетіні. Елімізде бизнес жасанды интеллектіні өздігімен қолданбайды. Көбіне дайын софттарды пайдаланады. Сөйтіп, бағдарлама өндірушісі сол бағдарламаларына жасанды интеллект қосып, клиентке жақсырақ шешім ұсынады. Мәселен, бұрын софт өндіруші алгоритмі әлсіздеу чат-бот қолданып келген болса, оның жаңартылған нұсқасында жасанды интеллект кірістіріліп, сапасы жақсара түскен бағдарламаны біздің бизнеске ұсынады деген сөз, – дейді ІT-сарапшы, «MSSP.GLOBAL» бас директоры Дәурен Салипов.
Конференцияда Ислам даму банкінің қолдауымен АХҚО және «CSQ Law» компаниясы дайындаған исламдық қаржыландыру жөніндегі елдік есептің таныстырылымы өтті. Есепте алғаш рет 13 000-ға жуық респондент арасында исламдық қаржы өнімдеріне әлеуетті нарықтық сұранысты бағалайтын кең ауқымды нарықтық зерттеу нәтижесіне негізделген деректер қамтылды.
– Біз осы маңызды бастама аясында АХҚО-мен ынтымақтастық орнатып жатырмыз. Бұл – үлкен қуаныш. Қазақстандағы исламдық қаржыландыру жөніндегі елдік есепте сектордың ағымдағы жай-күйі мен болашағы туралы құнды талдау ұсынылған. Есеп АХҚО-да ұсынылған исламдық қаржыны дамытудың стратегиялық жоспарының саясаты жөніндегі ұсыныстармен тоқайласады. Бұл есепті елдегі қаржы мекемелері мен инвесторлар исламдық қаржыландырудың бүкіл әлеуетін пайдалану жұмысында басшылыққа алса болады, – деді Ислам даму банкі институты бас директорының міндетін атқарушы доктор Сами Әл-Сувайлем.