Жаңғырған оқу ордасы
<p style="text-align: justify;">Жақында облыс орта­лы­ғын­да қазақ поэзиясының көр­­­некті өкілі Дулат Баба­тайұлының есімін иеленген Семей жоғары кол­лед­ж­інде білім күніне арналған іс-ша­ра өтті. Оған білім мен ғы­лым саласының өкілдері, сту­дент­тер және ата-ана­лар қа­тысты.</p>
Семей жоғары колледжі – 26 жылдан бері өңірде ғана емес, еліміздің түкпір-түкпірінде әртүрлі салада еңбек етіп жүрген білікті мамандарды түлетіп ұшырған оқу орындарының бірі. 1998 жылы аймақтағы алғашқы жекеменшік болып іргетасын қалаған колледж жаңа оқу жылын бірегей ізденістермен бастап отыр.
Мәдени іс-шара барысында ел ақсақалдары Арап Еспенбетов, Зейнолла Тоқаев, басқа да зиялы қауым өкілдері әйгілі ақын атындағы білім ұжымына ізгі лебіздерін арнап, батасын берді.
Соңғы жылдары кәсіби-техникалық мамандықтарға деген сұраныс артып отыр. Бір жағынан, бұл Мемлекет басшысының тікелей тапсырмасына сәйкес еліміздегі кәсіпорындарға көрсетіліп жатқан қолдау деп білеміз. Биыл аталған колледжде жұмысшы мамандығына 300-ге жуық грант бөлінген.
«Бұл өткен жылдардағы көрсеткіштермен салыстырғанда анағұрлым көп. Президенттің биылғы Жолдауында да жұмысшы мамандығына ерекше маңыз берілді. Бұған біз қатты қуандық. Қазір қоғамдағы сұранысқа ие мамандықтарды игеруге студенттерге барынша жағдай жасалған. Осы жылдан бастап колледж студенттерінің шәкіртақысы да өсті. Бұл – жұмысшы мамандығында оқитын жастарға көрсетіліп отырған үлкен қолдау. Қазір біз теория мен тәжірибені ұштастыру үшін жергілікті кәсіпорындармен келіссөз жүргізіп, мамандарды бірге даярлауды жоспарлап отырмыз», деді колледж директоры Ғафу Боранбаев.
Абай облысы