Керек дерек
<p style="text-align: justify;">Кәмелетке толмаған балалардың, әрекетке қабілетсіз немесе әрекет қабілеті шектелген азаматтардың заңды өкілдері енді «eGov.kz» порталы арқылы олардың мүлкі және мүлікке тіркелген құқықтары туралы анықтамаларды ала алады. Бұл қызмет жылжымайтын мүлік туралы мәліметтерді алу үдерісін айтарлықтай жеңілдетеді.</p>
Мемлекеттік қызмет енді үшінші тұлғаларға, яғни 18 жасқа толмаған баланың қамқоршыларына және әрекетке қабілетсіз немесе әрекет қабілеті шектелген кәмелетке толған азаматтардың заңды өкілдеріне қолжетімді болды. 6-нысандағы анықтама өтініш берушінің атында мүліктің бар немесе жоқ екенін растайды, ал 2-нысандағы анықтама мүлікке меншік құқығы және оған салынған шектеулер, мысалы, қамау немесе кепіл туралы ақпаратты қамтиды. Бұл мәліметтер жылжымайтын мүлікпен жасалатын мәмілелер, несие алу, тұрғын үй бағдарламаларына қатысу және басқа да құқықтық және әкімшілік рәсімдер үшін қажет.
Анықтамаларды алу үшін заңды өкілдерге ең әуелі «eGov.kz» порталында авторизациядан өтіп, «Жылжымайтын мүлік» – «Сатып алу, сату, жалға алу» бөлімдеріне өту қажет. Содан соң «Ф-6 анықтамасы (мүліктің бар екені туралы)» немесе «Ф-2 анықтамасы (мүлікке шектеулердің, кепілдің, қамаудың жоқтығы туралы)» қызметті таңдап, «Балаға (18 жасқа дейінгі, оның ішінде қамқорлықтағы және қорғаншылықтағы балаға)» немесе «Заңды өкіл (әрекетке қабілетсіз немесе әрекет қабілеті шектелген кәмелетке толған азаматтарға)» нұсқасын таңдау керек. Қызметтің нәтижесімен пайдаланушы жеке кабинет арқылы таныса алады.
Айта кетейік, бұл қызметті Оқу-ағарту министрлігі, сондай-ақ Еңбек және халықты әлеуметтік қорғау министрлігі Цифрлық даму, инновациялар және аэроғарыш өнеркәсібі министрлігімен бірлесіп әзірледі.