Қаһарман Хиуаз ескерткіші
<p style="text-align: justify;">Ресейдің Астрахан облысымен шектесетін Құрманғазы ауданын­да Хиуаз аталатын ауыл бар. Жаңаталап ауылдық округіндегі бұл ауылға Халық қаһарманы Хиуаз Доспанованың есімі берілген.</p>
Жақында осы ауылда Екінші дүниежүзілік соғыс кезінде ұшақпен 300 рет әуеге көтерілген қаһарман ұшқыштың ескерткіші орнатылды. Құрманғазы ауданы әкімінің орынбасары Амангелді Мұратовтың айтуынша, осыған байланысты ескерткіш жобасы облыстық тарихи-мәдени ескерткіштерді қорғау комиссиясында қаралған. Үздік деп танылған ескерткіштің авторы – мәдениет қайраткері, Қазақ ұлттық өнер университетінің профессоры, мүсінші Бақытбек Мұхамеджанов.
«Хиуаз Доспанова – соғыс кезінде қазақтың қайсар ұлт екенін танытқан қаһарман. Соғыстан кейін еліміздің өркедеуіне үлесін қосты. Екінші дүниежүзілік соғыста ерлігімен аты шыққан батырдың есімін ұрпақ жадында қалдыруды көздедік. Бұл ескерткіш – қаһарман рухына құрметіміздің бір парасы. Майдангерлердің ерлігін ұлықтауға арналған іс-шаралар жалғасын табады», дейді Амангелді Мұратов.
Жаңаталап аулындағы ардагерлер кеңесінің төрағасы Серік Сапарғалиевтің пікірінше, жас ұрпақ бейбіт күнге жеткізген майдангерлердің ерлігін ұмытпауы қажет. Қаһарман ұшқыштың туысы Ержан Рысқалиев осындай ойын білдірді. Іс-шара кезінде жергілікті өнерпаздар Гүлзада Жұмалиева, Жадыра Оқашева ән шырқады. Ал Жазира Сәрсенғалиева «Батыр қыздың» монологін оқыды.
«Мұндай ескерткіштер жас буынды отаншылдыққа тәрбиелейді. Сол себепті туындыда қазақтың қайсарлығын, рухын көрсетуге тырыстым», дейді мүсінші Бақытбек Мұхамеджанов.
Атырау облысы