Жұмыс ырғағы үзілмеген құрылыс
<p style="text-align: justify;">Жаңаөзен қаласы тұрғындарын жұмыспен қамту үшін жұмыс орындарын ашу маңызды. Сорғы-компрессорлық құбырлар мен сорғы штангаларын өндіретін зауытты Жаңаөзеннен салу бір жағы жұмыссыздық мәселесін еңсеруге сеп болса, екіншіден мұнайлы қаладағы өндіріске қажетті жабдықтарды алыстан арбаламай, өз қаласы аумағынан алдыруға мүмкіндік береді.</p>
Зауыт құрылысы жауапкершілігі, яғни тапсырыс беруші міндеті «Қаскор Инжиниринг» ЖШС құзырында. Бұл құрылым мұнай-газ кәсіпорындарының қажеттіліктеріне арнап мұнай кәсіпшілігі мен химиялық жабдықтардың тұтас желісін шығарады. Маңғыстау облысының жетекші машина жасау кәсіпорындарының бірі ретінде танымал. Компания оқшаулау бағдарламасы аясында 2023 жылы сорғы-компрессорлық құбырлар мен сорғы штангалары өндірісін Жаңаөзен қаласында зауыт салып, көшіруге шешім қабылдаған. 34 жыл өтілі бар, оның ішінде сорғы штангаларын өндіруде 2 жыл, пеш дайындауда 16 жыл және сорғы-компрессорлық құбырлар өндіруде 9 жыл тәжірибесі бар компания жаңа зауытқа 17,3 млрд теңге инвестиция тартып отыр. Зауытқа 300-ге жуық қала тұрғынын тарту жоспарланған.
Қазір мұнайлы қаладағы №1 өндірістік аймақта жалпы ауданы 12 гектар құрылыс аумағында зауыт құрылысы басталған. Құрылысқа қажетті барлық инфрақұрылымдық жабдықтау мен жеткізулердің дер кезінде жүзеге асырылуы нәтижесінде бас мердігер «М-СтройТранс» ЖШС компаниясының жұмысшылары бақылап-өткізу пункті, асхана, 150 орындық жатақхана, тұрмыстық қызмет көрсетуге арналған модульдік ғимараттарын монтаждап, зауыт бағаналарын толықтай тұрғызып үлгеріпті.
«Зауыт құрылысының дайындық жұмысы, инфрақұрылым жеткізу биыл сәуір айында басталды. Құрылыс аумағында қазір «ASM», «Отан-инжиниринг» атты екі компания мердігерлік жұмыс жүргізіп жатыр. Жұмысты жоспарланған мерзімде аяқтау міндетіміз, сол себепті бақылап-өткізу пункті, асхана, жатақхана, тұрмыстық қызмет көрсетуге арналған модульдік ғимараттарын биыл қыркүйек айының соңына таман аяқтаймыз деп отырмыз. Ол нысандардың құрылыс материалдары толықтай келіп, дайын тұр», дейді «М-СтройТранс» ЖШС компаниясының учаске басшысы Жеңіс Тукаев.
Құрылыс алаңында алып техникалық көліктер ыңырси қозғалып, ауыр темір қондырғыларды тіктеп тұрғызып жатыр. Бір күнде бір бригада 10 темір бағананы тұрғызып үлгереді екен. Ал жоспарланған төрт бригада жинақталып, толық іске кіріскен кезде жұмыстың қарқын ала түсері анық. Маңғыстаудың желі мен шаңы құрылыс алаңының астан-кестенін шығарып аласұрып-ақ жатыр, бірақ құрыш білекті құрылысшы жігіттер алаңда әрі ауыр жұмыспен, әрі жел-шаңмен жағаласып қызу еңбекке кіріскен.
Маңғыстау облысы