Халықаралық жұмысшы мамандықтарының жастар форумы өтті
<p style="text-align: justify;">Кәсіподақтар күні қарсаңында Астанада «Еңбек эволюциясы: Климат, Құзыреттілік, Код» тақырыбында Халықаралық жұмысшы мамандықтарының жастар форумы өтті, деп хабарлайды <a href="/" target="_blank" rel="noopener noreferrer">Egemen.kz</a> Мәдениет және ақпарат министрлігіне сілтеме жасап.</p>
Жиында Қазақстан, Әзербайжан, Өзбекстан, Қырғызстан, Тәжікстан сарапшылары сөз сөйлеп, климаттық өзгерістердің, цифрландырудың және жаңа технологиялардың жұмысшы мамандықтарына әсерін талқылады.
Аталған мәселелердің өзектілігін Мәдениет және ақпарат министрлігінің Жастар және отбасы істері комитетінің төрағасы Қайрат Қамбаров атап өтті.
«Мемлекет басшысы Қазақстан халқына арнаған Жолдауында 2025 жылды жұмысшы мамандықтар жылы деп жариялады. Осы уақыт ішінде техникалық және кәсіптік білім беру жүйесін реформалау қажет. Жұмысшы мамандықтар жылы қоғамымызда еңбекқорлық пен кәсібилік идеясын ілгерілетуге ықпал етеді», деді ол.
Сонымен қатар форум қатысушыларына жасанды интеллектпен жұмыс істеу дағдыларын және PR, SMM негіздерін үйретуге арналған практикалық сессиялар ұйымдастырылды.