Тарихи тұлғалардың күрескерлік шежіресі
<p style="text-align: justify;">Астанада «Тарихи тұл­ғалар туралы толғам» атты көрме ашылды. Тәуелсіздік күніне орай ұйым­дастырылған іс-шара мемлекет қай­рат­керлері Мұ­хаметжан Тыныш­баев­тың 145, Мұс­­тафа Шо­қайдың 134, Сәкен Сейфул­лин­нің және Тұрар Рыс­­құлов­тың 130 жыл ме­рей­той­ларына арналған.</p>
Президент іс басқармасына қарасты Президенттік орталықта ашылған көрменің мақсаты – тарихи тұлғалардың рухани мұрасын кеңінен насихаттау. Ол үшін Ұлттық архивтен, Сәкен Сейфуллин музейінен, Жетісу облысының Мұхамеджан Тынышбаев атындағы тарихи-өлкетану музейінен, Тұрар Рысқұлов атындағы Түлкібас аудандық тарихи-өлкетану музейінен, Жамбыл облыстық тарихи-өлкетану музейлерінің қорларынан фотосуреттер мен құжаттар алынған.
– Бұл – болашақ ұрпақ үшін өте маңызды. РКФСР Халық Комиссарлары кеңесі төрағасының орынбасары болып 11 жыл қызмет істеген, Тұрар Рысқұловтың еңбегі ұшан-теңіз. XX ғасырдың 30-жылдары Бүкілодақтық коммунистік партияның орталық комитетіне бұрын-соңды болмаған аштыққа ұшыраған қазақ халқының тағдыры туралы үндеулердің есебінен Қазақстанға азық-түлік көмегін көрсету мәселесі шешілгенін ерекше атап өту керек, – деді Т.Рысқұловтың немересі Адель Рысқұлова.
Ұйымдастыру аясында жүргізілген іздестіру-жинақтау жұмыстарының нәтижесінде алынған М.Шоқайдың 1920–1930 жылдары қолданған жазу мәшіңкесі, «Яш Түркістан» журналын шығару барысында пайдаланған мөрлері, Тұрар Рысқұловтың редакциясымен жарық көрген «Восстание 1916 года в Киргизстане» кітабы, «АЛЖИР» тұтқыны Әзиза Рысқұлованың сандығы, «Хашия Радия Мұхтар» кітабы, сия сауыт, күрсі сынды түпнұсқа жәдігерлер көрермендердің ерекше қызығушылығын тудырды.
– 1991 жылы қол жеткізген тәуелсіздік – еліміздің өз бостандығы, ар-намысы, абыройы, бірлігі мен туған жерінің тұтастығы үшін сан ғасырлық күресінің қисынды нәтижесі. Биыл мерейтойларын атап өтетін қазақ халқының біртуар перзенттері – М.Тынышбаев, М.Шоқай, С.Сейфуллин, Т.Рысқұловтың қызметі де осы шежіренің даңқты парағына айналды. Халқымыздың егемендікке жету жолындағы басты белестерді еске сала отырып, мемлекеттігіміздің қалыптасуы мен дамуында елеулі рөл атқарған Алаш және Түркістан автономияларын еске алу, кейінгі ұрпаққа насихаттау бүгінгі біздің парызымыз, – деді Президенттік орталық директоры Бақытжан Темірболат.
Айта кетейік Президенттік орталықтың кітапхана және музей қорларынан экспонаттар мен кітаптар, мемлекет қайраткерлері туралы тарихи құжаттар қойылды. Барлығы 170-ке жуық материал орналастырылды.