Қармақшыдағы «Руханият орталығы»
<p style="text-align: justify;">Биыл Сырдағы «Руханият жылы» аясында мәдени-көпшілік шаралармен қатар, ауқымды жобалар жүзеге асырылды. Жыл басында 1000 орындық «Өнер орталығы» ашылып, жаңадан симфония оркестрі, инклюзивті театр, Жастар театры, заманауи би және хор ұжымдары жасақталды. Ежелі жыр сарынын сақтаған өлкедегі биылғы жаңалықтың тағы бірі – «Жыраулар үйі».</p>
Жыл шеңберінде барлық ауданда «Руханият орталықтарының» іргесі қаланып, Тәуелсіздік күні қарсаңында Қармақшы ауданында осы орталықтың ашылу рәсімі өтті. Жұртшылықты жаңа нысанның ашылуымен құттықтаған облыс әкімі Нұрлыбек Нәлібаев әлеуметтік-экономикалық бағыттағы жетістіктерге тоқталды.
«Бүгін – ғасырлардың үнін жаңғыртып, халқымыздың қазынасын еселеген Сыр руханияты үшін айтулы күн. Ең алдымен, баршаңызды мыңжылдықтардың мұраты, Алаштың асқақ арманы болған Тәуелсіздік күнімен шын жүректен құттықтаймын!
Биылғы «Руханият жылы» аясында барлық 7 ауданда құны 11 млрд 500 млн теңге болатын, ішінде неке қию залы, кітапхана, музей, архив, жастар сарайы, ардагерлер мен аналар үйі бар «Руханият орталықтары» салына бастағанын білесіздер. Осы арқылы түрлі бағытта қызмет көрсететін мекемелерді бір орталыққа біріктіріп, бюджет қаражатын тиімді басқару, әкімшілік шығындарды азайтуға болады. Жыл соңына дейін тағы 5 ауданда «Руханият орталығы» жұмысын бастайды. Қалған 2 орталық келесі жылдың наурыз айында ел игілігіне беріледі» , деді облыс басшысы.
Жиында белгілі ақын Шәкизада Әбдікәрімов аймақтың руханият саласындағы ауқымды жұмыстарға тоқталса, мемлекет және қоғам қайраткері Бақберген Досмамбетов бата берді. Салтанатты рәсімде ауданның өсіп-өркендеуі жолында еңбек еткен ардагерлер мен орталықты салған құрылысшыларға көп алдында құрмет көрсетілді.
Қызылорда облысы,
Қармақшы ауданы