Ұрпақ сабақтастығының үлгісі
<p style="text-align: justify;">Ақтөбе облыстық тарихи-өлкетану музейінде тіл білімі саласындағы алғашқы қазақ профессоры, түркітанушы ғалым Құдайберген Жұбановтың туғанына 125 жыл толуына орай «Алты Алаштың ардағы» атты тарихи-та­нымдық іс-шара өтті. Оған ғалымның ұрпақтары арнайы келді. Көрмеге Құдайберген Қуанұлының жария­ланған еңбектерінің көшірмелері, кітаптары, өзі мен отба­сылық фотосуреттер, зайыбы Раушан апайдың тұтынған заттары қойылды.</p>
Оның ұрпақтары да ғылым мен өнерде елеулі жетістікке жеткен тұлғалар. Құдайберген мен Раушан апайдың үлкен қызы – Мүслима. Одан кейінгі перзенттерінен Ақырап Құдайбергенұлы – дарынды суретші, Есет Құдайбергенұлы (1927-2004) – лингвист, филология ғылымдарының докторы, профессор. Қыздары – Қырмызы және Қызғалдақ. Ғалымның кенжесі Асқар математикалық лингвистикаға зор еңбек сіңірген.
Құдайберген Қуанұлы 1899 жылы 19 желтоқсанда Темір уезінің Темір-Орқаш болысындағы Қосуақтам деген жерінде дүниеге келген. 1962 жылы 90 жасында дүние салған анасы Тәңірбергенқызы Бибішынардың айтуынша, Құдайберген желтоқсан айының ортасында туған. Әкесі Қуан орта шаруалы, медреседе оқыған, араб және орыс тілдеріне жетік жан екен. Парасатты әке балаларының жақсы білім алуына мән берген. Құдайберген Орынбордағы «Хусайния» медресесін тәмамдап, 1928 жылы Ленинградтағы Шығыстану институтында оқиды.
1932-1937 жылдары Қазақ КСР Оқу-ағарту халық комиссариатының ғылыми-әдістемелік кеңесінің төрағасы болған.
Кездесуде ұлы ғалымның ұрпақтары – немересі Ардақ Есетқызы Жұбанова, жиені Дана Әли (Қызғалдақ Құдайбергенқызының қызы), Асқар Құдайбергенұлының зайыбы Эльмира Жұбанова Раушан әжелерінің естеліктерімен бөлісті. Мұғалжар ауданындағы Қ.Жұбанов атындағы орта мектептің директоры Нұрбол Ибраев осы әулетпен араласқан ақсақалдардың әңгімелерін ортаға салды. Темір ауданының Орқаш деген жерінде Қуан құдығының орны әлі күнге дейін сақталған.
Ақтөбе облысы