Ұлттық кино қоржыны

<p style="text-align: justify;">Былтыр Ұлттық киноны қолдау орталығының қолдауымен 17 жобаның өндірісі аяқталған еді. Атап айтсақ, «Қайрат», «Игроманка», «Капитан Байтасов», «Qaitadan», «Фейковый арман», «Мангистау – край океана Тетис», «Күн ұясына батқанда», «Үміт әрдайым жанымызда», «Шырмауық», «Осенний бриз», «Граждане крыши», «Құт», «Мы здесь живем», «Победителей видно на старте», «Здравствуй, добрый человек», «Соңғы парыз» фильмдері бар. Ал «Алан туралы аңыз» ауқымды анимациялық жоба болғандықтан осы жылы аяқталмақ.</p>

Сондай-ақ биыл питчингтен өткен 17 жобаның түсірілім жұмысы басталады. Олардың қатарында әлеуметтік маңызы жоғары, кең ауқымды көрермен аудиториясына арналған фильмдер, оқиғалы, бірлесіп шығарылатын, анимациялық, деректі және дебюттік фильмдер де бар.

Мәселен, «Кенжем қайда?» көркем туындысында кенже баланың тағдыры баяндалып, отбасы құндылығы суреттеледі. Аталған фильм балаларын жалғыз өзі асырап отырған Гүлназдың тағдырын қозғайды. Кинокартинаның продюсері – Анар Жүнісова, Анна Чакиртова. Режиссері – Диас Құлмақов.

Түсірілім жұмысы осы жылға жоспарланған тағы бір туынды – «Ақжелең». Махаббатқа адалдық, қазақ әйелінің қайраткерлігі, бауырмалдық, анаға деген сүйіспеншілік суреттелетін фильм нәзік бір иірімге толы болмақ. Продюсері – Бағашар Арықбаев, режиссері – Бекзат Смадияров.

Қазақ киносы тарихындағы орманшылар туралы тұңғыш жеке кинокартина да биыл түсіріледі. Режиссер Рашид Сүлейменовтің «38» фильмі қарапайым еңбек адамының ерлігін ашып көрсетуді мақсат етіп отыр. Сондай-ақ детектив жанрындағы «Бүркітші» фильмінде ауылдағы жұмбақ жағдайдың сыры ашылады. Шытырман оқиғаға негізделген кинокартинаның продюсері – Мәдина Дүйсембаева, режиссері – Қуаныш Стаханов.

Мюзикл жанрындағы «Ар мен сезім» картинасы да биыл түсірілмек. Туынды көрерменді ар-намыс қасиетін жоғары қоюға, адалдыққа, адамгершілікке үндейді. Жастардың бойына ұлттық құндылықтарды сіңіруді мақсат етіп, ұлттық мәдениетіміз бен өнерімізді насихаттайды. Қазақтың атбегілік өнерін жаңғырту, ұлттық музыкасын жаңа қырынан көрсетуге негізделген фильм болмақ. Продюсері – Бақытжан Құлжабаев, режиссері – Батырхан Дәуренбеков.

Осы жылға жоспарланған дебюттік фильмдер де киноөндіріс саласына өз даусымен, өз қолтаңбасымен келмек. Әмір Әменовтің «Сағындым сені», Аяна Нұрдинованың «Мұғалім» көркем картиналары адамгершілік, ізгілік, ұстазға құрмет сынды адамзаттық мұраттарды тақырып етеді.

Сондай-ақ швейцариялық саяхатшы, жазушы Элла Майярдың Түркістан даласына сапары суреттелетін Қанат Төребайдың «Туркестан-Соло» деректі фильмінің түсірілім жұмысы да өз кезегін күтіп тұр.

Балалар аудиториясына арналған контентке де ерекше мән беріліп отыр. Жанат Жайлыбайдың «Адамзатқа іздеу саламын» анимациялық фильмі жасанды интеллектінің мүмкіндіктерін көрсетпек. Туынды кішкентай көрерменге адамдар арасындағы жылы қарым-қатынасты, табиғатқа іңкәрлікті көрсеткісі келеді. Ал Әміржан Қазиевтің «Жібек» анимациялық фильмінде Шығыс пен Батыс арасындағы мәдени байланыс баяндалады.

Сондай-ақ дебюттік фильмдер қатарында Татьяна Шишкинаның «Батыл бол» анимациясы да түсірілмек. Бұл фильмде тіл мәселесі қаузалып, еліміздегі береке-бірлік сынды ұлттық ұғымдар көтеріледі.

Иә, бұл түсірілім жұмысы биыл өтетін туындылардың бір бөлігі ғана. Экранға шығатын басқа да жаңа фильмдер қоғамды толғандырған тақырыптарды қамтиды.