Өзіміздің Ибн Синадай
<p style="text-align: justify;">Академик Камал Ормантаев туралы көп айтылды, көп жазылды, тіпті фильм де түсірілді. Ол – еліміздегі балалар хирур­гиясының негізін қалаған дәрі­гер, мыңдаған баланың өмірін құтқарып, олардың тағдырына әсер еткен тұлға. Ата-аналарға үміт, балаларға өмір сыйлаған ғалымға қандай құрмет көрсетсек те артық емес.</p>
Академик медицинада өз мектебін қалыптастырды, шәкірт тәрбиеледі. Оның оқушылары бүгінде профессор, доцент, білікті маман атанып, ұстазының ісін жалғастырып келеді. Бұлардың көбі – қарапайым ауылдан шыққан азаматтар. Камал Сәруәрұлы Сыр өңірінде туса да, тұтас қазақтың, тіпті әлемнің дәрігері, ғалымы бола алды.
Профессор К.Ормантаевты Қазақ ұлттық медицина университеті ұжымы қайбір жылы «ХХІ ғасырдың Авиценнасы» атағымен марапаттады.
Ол шын мәнінде ұлы дәрігер, ғалым, ұстаз болды. Оның еңбектері әрқашан сұранысқа ие. Студенттер мен дәрігерлер Камал Сәруәрұлының оқулықтарын іздеп оқиды. Нағыз ғалымның жазғаны шаң баспайды.
Академиктің мерейтойына арналған деректі фильмде оны Д.Сэлинджердің «Жар жағалаған жалғыз» романындағы кейіпкерге теңеген едім. Романдағы кейіпкер балаларды құтқаруды армандаса, Камал Сәруәрұлы шын мәнінде мыңдаған баланың өмірін сақтап қалды. Ол – нағыз дәрігер, өз ісінің жанашыры, ұстаз, академик. Ол ашық сөйлейтін, кейде қатал да көрінетін. Бірақ әрдайым адал болатын. Осы қасиеті жаңа ұрпаққа да бұйырсын дейміз.
Талғат МОМЫНОВ,
ҰҒА академигі