Қалдық өңдеудің тиімді тәсілі
<p style="text-align: justify;">Х.Досмұхамедов атындағы Атырау университетінің сту­денттері қамыс пен тамақ қалдықтарынан фитоқабат өндірудің тиімді тәсілін ойлап тапты. Студенттер бұл үшін «Waste2wear» командасын құрған.</p>
Команда капитаны Дильназ Досмұхамбетованың айтуынша, жаңа жоба пластикке экологиялық балама жасау мақсатында әзірленген. Олар төрт айда фитоқабаттың құрылымын қалыптастыруға, гидрофобты қасиеттерін арттыруға, жағымсыз исін жоюға қол жеткізген.
«Біз шикізат ретінде негізінен қамыс пен целлюлозаны пайдалануды жоспарладық. Алайда целлюлоза – қымбат материал. Сол себептен, оны алмастыру үшін банан мен апельсин қабығын қолдануды жөн көрдік. Қамыс пен тамақ қалдықтарын ұнтақтап, белгілі бір пропорцияда араластыру арқылы фитоқабат аламыз», дейді Дильназ Досмұхамбетова.
Аталған команданың мүшесі Дмитрий Уарчевтің айтуына қарағанда, фитоқабатты әртүрлі өнімді шығаруда қолдануға болады. Енді оны бизнес-жоба ретінде жүзеге асыру көзделген. Бірақ бұл жобаны іске асыру үшін қаржылық және консультациялық қолдау қажет.
Атырау облысы