Әлемдік байқауда бақ сынайды
<p style="text-align: justify;">Оралдағы Назарбаев зияткерлік мектебінің оқушылары елдің атынан роботтехника бойынша әлемдік байқауға барады. Алматы қаласында «Almaty Tech Cup 2025» атты Орталық Азиядағы роботтехника және дрондар чемпионаты аяқталды. Оған 10-нан аса елден 3 мыңнан астам бала қатысты.</p>
Чемпионаттың «FLL» бағытындағы Орал Назарбаев зияткерлік мектебінің «Tidal Tumble» командасы «Robot Design» санатында жеңімпаз атанды. Олар енді Аустралияның Сидней қаласында өтетін «Asia Pacific Open First Championship 2025» халықаралық жарысына барады.
Қазылар НЗМ оқушылары жасаған робот дизайнын жоғары бағалаған. Өйткені ол жобаның инновациялық шешімдері ерекше болыпты. «Оралдық оқушылардың техникалық білімі, шығармашылық қабілеті және командалық жұмысы жоғары деңгейде», дейді қазылар.
«Asia Pacific Open First Championship 2025» – роботтехника саласындағы ең беделді халықаралық жарыстың бірі. Бұл сайысқа әлемнің әр түкпірінен үздік командалар қатысып, өз жобасын ұсынады. Назарбаев зияткерлік мектебінің жеңімпаз командасы енді ел намысын әлемдік деңгейде қорғауға дайындалып жатыр.
«Бұл жеңіс оқушылардың қажырлы еңбегімен, жетекшілерінің кәсіби дайындығымен келді. Сонымен бірге аталған зияткерлік мектепте «STEM» білім сапасы жоғары екенін дәлелдейді», дейді Орал қаласындағы физика-математика бағытындағы НЗМ баспасөз хатшысы Гүлнәз Нұғманқызы.
Батыс Қазақстан облысы